O‘zbekiston Respublikasi Oliy Majlisi Senati Kengashining 2025-yil 14-yanvardagi KQ-35-sonli qarori ijrosini ta’minlash hamda aholi bilan to‘g‘ridan-to‘g‘ri muloqotni kuchaytirish maqsadida “14-Bog‘zor” saylov okrugida nazorat-tahlil tadbiri o‘tkazildi.

Tadbir davomida “Bog‘zor” mahallasi Boborahim Mashrab ko‘chasida yashovchi fuqarolar ko‘chadagi elektr simyog‘ochlari eskirib, o‘z xizmat muddatini o‘tab bo‘lganini ma’lum qildi. Aholi eskirgan ustunlarni yangi beton ustunlarga almashtirishda amaliy yordam so‘radi.

Mazkur holat nafaqat elektr ta’minotida uzilishlar yuzaga kelishi, balki aholi va ularning mol-mulki xavfsizligiga xavf tug‘dirishi mumkinligi bilan ham dolzarb ahamiyatga ega.
Fuqarolar murojaati e’tiborsiz qoldirilmadi. Aniqlangan muammoni bartaraf etish maqsadida Termiz shahar elektr ta’minoti korxonasi boshlig‘i Sh.Ochilovga deputat so‘rovi yuborildi.

Deputat so‘rovida Boborahim Mashrab ko‘chasidagi eskirgan elektr simyog‘ochlarini bosqichma-bosqich zamonaviy beton ustunlarga almashtirish, elektr uzatish tarmoqlarining texnik holatini ko‘zdan kechirish hamda aholini sifatli, barqaror va xavfsiz elektr energiyasi bilan ta’minlash choralarini ko‘rish so‘raldi.