Xalq deputatlari Muzrabot tumani Kengashiga 10-Yangiyer saylov okrugidan saylangan deputat T.Tangirov hamda tuman Kengashi kotibiyati bosh mutaxassisi B.Xoliqov hamkorlikda “Yangiyer” mahalla fuqarolar yig‘inida bo‘lib, aholi tomorqalaridan samarali foydalanish holatini o‘rgandilar.

O‘rganishlar davomida mahalladagi namunaviy xonadonlarga tashrif buyurilib, aholining tomorqadan daromad olish bo‘yicha tajribalari bilan tanishildi. Jumladan, fuqaro Xolboev Odil xonadonida borilib, uning tomorqasida tashkil etilgan 2 sotixli issiqxona faoliyati ko‘zdan kechirildi. Issiqxonada pomidor va bodring kabi sabzavot mahsulotlari yetishtirilib, oila uchun munosib daromad manbai yaratilgan. Xonadon egalari o‘z mehnatining samarasidan mamnun ekanliklarini bildirdilar.

Shundan so‘ng, keksa pedagog, biologiya fani o‘qituvchisi Qulahmedova Momaxol opa xonadoniga tashrif buyurildi. U yerda 6 sotix yer maydonida tashkil etilgan issiqxonada limon, mandarin va apelsin kabi sitrus mevalari parvarish qilinmoqda.
Mazkur tajribalar aholi tomorqalaridan samarali foydalanish, oziq-ovqat xavfsizligini ta’minlash va oilaviy daromadlarni oshirishda muhim ahamiyat kasb etadi.

O‘rganishlar yakunida tomorqachilik va issiqxonachilik orqali o‘z turmush farovonligini yaxshilashga erishgan fuqarolar faoliyatini mahalla ahliga namuna sifatida keng targ‘ib qilish, boshqa aholini ham ushbu yo‘nalishdagi faoliyatga jalb etish zarurligi ta’kidlandi.