MAHALLADA JAMOAT XAVFSIZLIGI VA SANITAR TOZALIK MASALALARI OʻRGANILDI 

Xalq deputatlari Quva tuman Kengashi deputati O.Tillayeva kotibiyat bosh mutaxassisi
M.Toʻxtasinov bilan birgalikda Toshkent mahalla fuqarolar yigʻinida
profilaktika inspektori tomonidan huquqbuzarlik va jinoyatchilik holatlarini
oldini olish boʻyicha olib borilayotgan ishlar holati hamda “Fargʻona tozalik
sanitar servis” MChJ Quva tuman filiali tomonida mahalla hududidan
chiqindilarni oʻz vaqtida olib chiqib ketilishi masalalari oʻrganildi. 

Oʻrganishlar davomida joriy yilning birinchi choragida mahalladagi kriminogen vaziyat,
huquqbuzarlik va jinoyat holatlarini oldini olish boʻyicha profilaktika
ishlarining samaradorligi, ayniqsa yoshlar oʻrtasida huquqbuzarliklarning
oldini olishga qaratilgan chora-tadbirlar holati tahlil qilindi, mahallada bu
borada olib borilayotgan ishlar natijasida bironta ham jinoyat holatlari sodir
etilmaganligi, 2026-yilning birinchi choragida profilaktika inspektoriga 140 ta
murojaat kelib tushgani, ularning barchasi belgilangan tartibda va oʻz vaqtida
koʻrib chiqilgani, shuningdek, olib borilgan manzilli profilaktik
chora-tadbirlar natijasida 5 ta jinoyatning oldi olingani eʼtirof etilib,
kelgusidagi vazifalar yuzasidan tavsiyalar berildi. 

Shuningdek, deputat tomonidan “Fargʻona tozalik sanitar servis” MChJ Quva tuman filiali
rahbari ishtirokida mahalla faollari bilan ochiq muloqot oʻtkazilib, masʼul
tashkilot tomonidan mahalla aholisiga koʻrsatilayotgan xizmat sifati, xususan
chiqindilarni oʻz vaqtida va belgilangan grafik asosida olib chiqib ketish
holati atroflicha oʻrganildi. 

Oʻrganish davomida xizmat koʻrsatish jarayonida yuzaga kelayotgan muammolar va ularni
bartaraf etish yoʻllari muhokama qilinib, mahalla faollari tomonidan
bildirilgan taklif va tavsiyalar asosida aholiga xizmat koʻrsatish
samaradorligini oshirish, chiqindilarni oʻz vaqtida yigʻib olish tizimini
yanada takomillashtirish boʻyicha masʼul tashkilot rahbariga tegishli
tavsiyalar berildi.