Xalq deputatlari Jondor tumani Kengashi deputatlari va mutaxassislari tomonidan hududdagi ijtimoiy himoyaga muhtoj oilalar holatini o‘rganish maqsadida joyiga chiqib o‘rganish ishlari olib borildi. Xususan, 1-Tinchlik saylov okrugidan saylangan deputat I.Xolov, 20-Zarafshon saylov okrugidan saylangan deputat M.Hojiyeva hamda Kengash kotibiyati bosh mutaxassislari J.Norov va R.Murodovlar hamkorligida “Ijtimoiy reyestr”ga kiritilgan oilalarning yashash sharoiti va ijtimoiy ahvoli o‘rganildi.

O‘rganish jarayonida fuqarolarning turmush darajasi, daromad manbalari, bandligi hamda mavjud muammolari atroflicha tahlil qilindi. Shuningdek, aniqlangan kamchiliklarni bartaraf etish, oilalarga amaliy yordam ko‘rsatish va ularning ijtimoiy qo‘llab-quvvatlanishini kuchaytirish bo‘yicha “Inson” ijtimoiy xizmatlar ko‘rsatish markaziga tegishli takliflar berildi.

Mazkur o‘rganishlar joriy oyda o‘tkaziladigan sessiyada ko‘rib chiqilishi rejalashtirilgan masalalarni puxta tayyorlashga xizmat qiladi. Bu esa hududda ijtimoiy adolatni ta’minlash, aholining ehtiyojmand qatlamlarini qo‘llab-quvvatlash va ularning hayot sifatini yaxshilashda muhim ahamiyat kasb etadi.