Xalq deputatlari Bo‘stonliq tumani Kengashining 2026-yilga mo‘ljallangan ish rejasiga muvofiq O‘zbekiston “Adolat” sotsial-demokratik partiyasidan saylangan deputat M.Ashurov va kotibiyat xodimi N.Kurganova tomonlaridan tumanning “Navro‘z” mahallasida aholi muammolarini o‘rganish ishlari olib borildi.

O‘rganish davomida ko‘p qavatli uy-joylarda amalga oshirilayotgan ta’mirlash ishlari joyiga chiqqan holda o‘rganildi. Qurilish va ta’mirlash ishlarining sifati, qurilish me’yorlari hamda xavfsizlik talablariga rioya etilishi, hududning sanitariya holati ko‘zdan kechirildi. Shuningdek, ko‘p qavatli uylarda yashovchi fuqarolar bilan muloqot qilinib, ular tomonidan qurilish ishlari davomida shovqin, qurilish changi hamda qurilish chiqindilari bilan bog‘liq noqulayliklar yuzaga kelayotganligini ma’lum qilishdi.

Muhokama davomida quruvchilarga qurilish ishlarini belgilangan vaqtlarda amalga oshirish, ortiqcha shovqinga yo‘l qo‘ymaslik, chang tarqalishining oldini olish uchun hududni muntazam namlash, qurilish chiqindilarini o‘z vaqtida olib chiqish, fuqarolarning erkin harakatlanishi uchun xavfsiz yo‘laklarni ta’minlash hamda sanitariya va ekologik talablarga qat’iy rioya qilish yuzasidan atroflicha tushuntirishlar berildi.