Prezidentimiz Shavkat Mirziyoyev raisligida o‘tkazilgan videoselektor yig‘ilishida mahallalarda mutlaqo yangi boshqaruv muhitini shakllantirish, “mahalla yettiligi” faoliyatini samarali tashkil etish hamda aholi muammolarini bevosita joylarda hal etish masalalariga alohida e’tibor qaratildi.

Xalq deputatlari Jondor tumani Kengashi deputati sifatida mazkur yig‘ilishda belgilab berilgan vazifalarni har bir mahallaning rivoji va fuqarolar farovonligini ta’minlash yo‘lidagi muhim islohotlar, deb bilaman. Ayniqsa, mahallalarda bandlikni oshirish, kambag‘allikni qisqartirish, oilalarni qo‘llab-quvvatlash, yoshlar va xotin-qizlar bilan manzilli ishlash, hududlarni obodonlashtirish bo‘yicha aniq vazifalarning belgilanishi xalqimiz manfaatlariga xizmat qiladi.

Bugungi kunda deputatlarning asosiy vazifalaridan biri ham mahallalardagi muammolarni o‘z vaqtida o‘rganish, ularni hal etishda “mahalla yettiligi” bilan yaqin hamkorlik qilish hamda qabul qilinayotgan qarorlar ijrosi ustidan samarali deputatlik nazoratini amalga oshirishdan iborat.

Ishonamanki, videoselektorda belgilangan ustuvor vazifalarning izchil amalga oshirilishi mahallalarimiz taraqqiyotini yangi bosqichga olib chiqadi, fuqarolarning hayot sifati va farovonligini yanada yuksaltirishga xizmat qiladi.