Yig‘ilishda O‘zbekiston Respublikasining "Ichki ishlar organlari to‘g‘risida"gi Qonuni hamda Prezidentimizning 2026-yil 5-yanvardagi PQ–1-son qarori ijrosi doirasida Termiz shahrida kriminogen vaziyatni yaxshilash, huquqbuzarliklar profilaktikasini kuchaytirish, jinoyatlarning kelib chiqish sabablari va shart-sharoitlarini bartaraf etish hamda korrupsiyaning oldini olish borasida 2026-yilning birinchi yarim yilligida amalga oshirilgan ishlar yuzasidan Termiz shahar Ichki ishlar boshqarmasi boshlig‘i M.Boltayevning hisobotiniTermiz shahar IIB mas'ul xodimi, mayor A.Salomov o‘qib eshittirdi.

Hisobotda ta'kidlanganidek, Prezidentning PQ–1 va PQ–2-son qarorlari asosida yil boshida jinoyatchilik darajasi yuqori bo‘lgan 8 ta mahallaga mas'ullar nomma-nom biriktirilib, ularning har biri oldiga hududlarni jinoyatdan holi va xavfsiz maskanga aylantirish vazifasi qo‘yilgan.

Amalga oshirilgan tizimli ishlar natijasida joriy yilning o‘tgan 6 oyi davomida Termiz shahridagi 37 ta mahallaning 15 tasida (40,5 foiz) birorta ham jinoyat sodir etilmadi. Shuningdek, "qizil" toifaga kiruvchi mahallalar soni o‘tgan yilning mos davriga nisbatan 33 foizga qisqarib, shahrimiz ushbu ko‘rsatkich bo‘yicha viloyatda ijobiy 5-o‘rinni egalladi.

Muhokamalar davomida deputatlar tomonidan hisobot yuzasidan fikr va takliflar bildirildi, huquqbuzarliklarning barvaqt oldini olish, mahallalarda xavfsiz muhitni yanada mustahkamlash hamda profilaktik tadbirlar samaradorligini oshirish bo‘yicha tavsiyalar berildi.

Yig‘ilish yakunida kun tartibidagi masala yuzasidan tayyorlangan qaror loyihasi ma'qullanib, ularni ko‘rib chiqish va yakuniy qaror qabul qilish uchun Xalq deputatlari Termiz shahar Kengashining navbatdagi sessiyasi kun tartibiga kiritish to‘g‘risida tegishli qaror qabul qilindi.