Bundan bir necha kun avval Xalq deputatlari Marg‘ilon shahar Kengashi deputati M.Abdurahmonova tomonidan o‘z saylov okrugidagi Mashad mahallasida aniqlangan kamchiliklar yuzasidan shahar, Obodonlashtirish boshqarmasiga deputat so‘rovi kiritilgani haqida xabar bergan edik.

​Deputatning mazkur soʻrovi hamda "Ko‘cha aylanish daftari"dagi qaydlari asosida yo‘llangan so‘rov mutaxassislar tomonidan atroflicha o‘rganilib, qisqa muddatlarda amaliy choralar ko‘rildi.

Mashad mahallasi Imom Zahiriddin ko‘chasidan o‘tuvchi va uzoq vaqt davomida tozalanmaganligi sababli sanitariya holati yomonlashgan tranzit ariq, garchi "Qo‘shtepa irrigatsiya" bo‘limi balansida bo‘lsa-da, aholi qulayligi yo‘lida deputatga biriktirilgan shahar Obodonlashtirish boshqarmasi mirob ishchilari tomonidan imkon darajasida to‘liq tozalandi va suv oqimi tiklandi.

​Mahallaning Zarafshon va Turkiston ko‘chalarida o‘sib ketgan hamda yo‘l harakati belgilarini, shuningdek, tungi yoritish chiroqlarini to‘sib qo‘ygan daraxtlarning shox-shabbalari boshqarma xodimlari tomonidan butalib, tartibga keltirildi. Hududdagi harakat xavfsizligi va ko‘chalarning yoritilish darajasi yaxshilandi.

​Deputat so‘roviga mas’uliyat bilan yondashib, muammolarni bartaraf etishda yaqindan ko‘maklashgan Marg‘ilon shahar Obodonlashtirish boshqarmasiga minnatdorchilik bildiramiz.

​Saylovchilar manfaati va hududlar obodligi yo‘lidagi deputatlik nazorati davom etadi.