Mazkur uchrashuv O‘zbekiston Respublikasi Prezidentining PQ–406-son qarori, O‘zbekiston Respublikasi Oliy Majlisi Senati Kengashining KQ–35–V-son qarori hamda mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiya ijrosini ta’minlash, aholi bilan ochiq muloqotni kuchaytirish va deputatlik nazoratini samarali tashkil etish maqsadida tashkil etildi.

Uchrashuv davomida mahalla yettiligi vakillari bilan hududdagi mavjud ijtimoiy-iqtisodiy masalalar, fuqarolarni qiynayotgan muammolar va ularni bartaraf etish yuzasidan amalga oshirilayotgan ishlar muhokama qilindi. Shuningdek, aholi bilan bevosita muloqot o‘tkazilib, fuqarolarning murojaat, taklif va mulohazalari tinglandi.

Bildirilgan murojaatlar belgilangan tartibda ro‘yxatga olinib, ularni hal etish yuzasidan mas’ul tashkilotlar bilan hamkorlikda amaliy choralar ko‘rish hamda ijrosini deputatlik nazoratiga olish belgilandi.

Uchrashuv davomida fuqarolar bilan ochiq muloqotni yanada kuchaytirish va murojaatlar bilan ishlash tizimini takomillashtirish masalasiga alohida e’tibor qaratildi. Shu maqsadda mahallaning ko‘rinarli hududlariga deputatga QR-kod orqali murojaat yuborish imkoniyati, shuningdek, deputatning fuqarolarni qabul qilish kunlari va vaqtlari ko‘rsatilgan axborot e’lonlari joylashtirildi. Mazkur tizim fuqarolarga deputat bilan tezkor bog‘lanish, o‘z murojaat va takliflarini qulay tarzda yo‘llash hamda ularning ko‘rib chiqilishi ustidan jamoatchilik nazoratini kuchaytirishga xizmat qiladi.