Xalq deputatlari tuman Kengashi deputati U.Achilov o‘zining 18-To‘rttol saylov okrugi hududida joylashgan To‘rttol mahallasida aholi farovonligini ta’minlash, hududning sanitariya holatini yaxshilash hamda obodonlashtirish ishlarini yanada kuchaytirish maqsadida targ‘ibot tadbirini amalga oshirdi. Tadbir davomida deputat mahalla ko‘chalarini aylanib, aholi bilan bevosita muloqot qildi. Suhbatlar chog‘ida mahalla hududidagi ariq-zovurlarni o‘z vaqtida tozalash, ko‘chalar va atrof-muhit ozodaligini ta’minlash, xonadonlar oldiga chiqarilgan g‘o‘zapoyalarni belgilangan joylarga olib kirish hamda sanitariya qoidalariga qat’iy rioya etish yuzasidan keng tushuntirish ishlari olib borildi. Shuningdek, fuqarolarga obod va ozoda mahalla barpo etish har bir aholining fuqarolik burchi ekani, ko‘chalarning tozaligi, ariqlarning ochiq va soz holda saqlanishi nafaqat hudud ko‘rinishiga, balki ekologik muhit va aholi salomatligiga ham ijobiy ta’sir ko‘rsatishi ta’kidlandi. Uchrashuv davomida mahalla aholisi tomonidan bildirilgan taklif va murojaatlar ham tinglanib, ularni qonunchilik doirasida hal etish yuzasidan tegishli choralar ko‘rish bo‘yicha mas’ul tashkilotlar bilan hamkorlikda ishlar olib borilishi ma’lum qilindi. Bunday targ‘ibot tadbirlari mahallalarda obodonlashtirish
ishlarini tizimli tashkil etish, aholi o‘rtasida ekologik madaniyatni yuksaltirish hamda hududlarni yanada ko‘rkam va fayzli maskanga aylantirishga xizmat qiladi