Xalq deputatlari Qo‘qon shahar Kengashi deputati N.Shomatov tomonidan "O‘rmonbog‘" MFYda faoliyat yuritayotgan ijtimoiy xodimi M.Usmonovning faoliyati hamda O‘zbekiston Respublikasining 2017-yil 11-sentabrdagi O‘RQ-415-sonli “Keksalar, nogironligi bo‘lgan shaxslar va aholining boshqa ijtimoiy ehtiyojmand toifalari uchun ijtimoiy xizmatlar to‘g‘risida”gi Qonuni ijrosi yuzasidan olib borilayotgan ishlar o‘rganildi.

O‘rganish davomida ijtimoiy xodim M.Usmonov tomonidan qonun talablarining amaliy ijrosi, ijtimoiy himoyaga muhtoj fuqarolarni qo‘llab-quvvatlash hamda ularga ko‘rsatilayotgan xizmatlar yuzasidan batafsil ma’lumot berildi.

Jumladan, joriy yilning o‘tgan davri mobaynida 6 nafar fuqaroga 6 million 425 ming so‘mlik oziq-ovqat vaucherlari, shuningdek 12 nafar fuqaroga 14 million 460 ming so‘mlik kiyim-kechaklar ajratilgani qayd etildi.

Shuningdek, nogironligi bo‘lgan shaxslarni ijtimoiy qo‘llab-quvvatlash, ularning salomatligini mustahkamlash, tibbiy-ijtimoiy reabilitatsiya xizmatlarini tashkil etish hamda sanatoriy va sihatgohlarga bepul yo‘llanmalar ajratish bo‘yicha amalga oshirilayotgan ishlar muhokama qilindi.

O‘rganish jarayonida fuqarolarning mazkur imtiyozlardan foydalanish imkoniyatlari, murojaatlarni ko‘rib chiqish tartibi, ijtimoiy xizmatlar sifati hamda ehtiyojmand fuqarolarni qo‘llab-quvvatlash tizimini yanada takomillashtirish masalalari yuzasidan fikr almashildi.