Xalq deputatlari Ishtixon tumani Kengashining Mahalliy byudjet, tadbirkorlikni rivojlantirish va iqtisodiy islohotlar masalalari bo‘yicha doimiy komissiyasining navbatdagi yig‘ilishida tumandagi ko‘p kvartirali uylarni ta’mirlash bilan bog‘liq masala muhokama qilindi.

Muhokama davomida O‘zbekiston Respublikasi Prezidentining 2026-yil 5-fevraldagi “Ko‘p kvartirali uylarni boshqarish tizimini yanada takomillashtirish bo‘yicha qo‘shimcha chora-tadbirlar to‘g‘risida”gi PQ-48-son qarori ijrosi doirasida tumanda amalga oshirilishi rejalashtirilgan ishlar yuzasidan taqdim etilgan hujjatlar va hisob-kitoblar ko‘rib chiqildi.

Xususan, ko‘p kvartirali uylarning kirish yo‘laklarini ta’mirlash, elektr taqsimlovchi shitlarni yangilash, energiya tejamkor yoritish vositalari hamda kodli qulflar o‘rnatish bilan bog‘liq tadbirlarni moliyalashtirish uchun mahalliy byudjetning qo‘shimcha manbalari hisobidan mablag‘ ajratish masalasi muhokama qilindi.

Masala yuzasidan taqdim etilgan hujjatlar, iqtisodiy hisob-kitoblar va amaldagi normativ-huquqiy hujjatlar talablari atroflicha o‘rganilib, mazkur tadbirlarni moliyalashtirish bo‘yicha taklifni Xalq deputatlari Ishtixon tumani Kengashining navbatdagi sessiyasi muhokamasiga kiritish maqsadga muvofiq deb topildi.

📍 Doimiy komissiya tomonidan hududlarda infratuzilmani yaxshilash, aholiga qulay shart-sharoitlar yaratish hamda mahalliy byudjet mablag‘larining qonuniy va maqsadli sarflanishini ta’minlash masalalariga alohida e’tibor qaratilmoqda.

Bizni ijtimoiy tarmoqlarda kuzating:
Telegramm | Web-sayt | Facebook | Instagram