Aholi bilan uchrashuvlar davomida aniqlangan muammolardan biri — “Nodirabegim” MFY hududida joylashgan TP-232-raqamli elektr transformatori atrofidagi xavfli holatdir. O‘rganishlar shuni ko‘rsatdiki, mazkur transformator atrofida zarur xavfsizlik choralariga amal qilinmagan: himoya to‘siqlari yetarli emas, ogohlantiruvchi belgilar esa deyarli mavjud emas.

Eng achinarlisi, ushbu obyekt ko‘p qavatli uylar yonida joylashgan bo‘lib, bu yerda har kuni bolalar o‘ynaydi. Mas’ul tashkilotlarning loqaydligi sabab, oddiy ehtiyotsizlik ham og‘ir oqibatlarga olib kelishi mumkin.

Shu holat yuzasidan Andijon viloyati “Hududiy elektr tarmoqlari” korxonasining “Yangi shahar” bo‘limiga deputat so‘rovi yuborildi.

So‘rovda:
— transformator atrofini zudlik bilan to‘liq o‘rash,
— aniq va ko‘rinadigan ogohlantiruvchi belgilar o‘rnatish,
— aholi, ayniqsa bolalar xavfsizligini ta’minlash bo‘yicha kechiktirib bo‘lmaydigan choralar ko‘rish qat’iy talab qilindi.

Mazkur masala qat’iy nazoratga olingan. Mas’ul tashkilotlar shuni unutmasligi kerak: bunday e’tiborsizlik inson hayoti bilan bog‘liq masalada kechirilmaydi.