Xalq deputatlari Uchquduq tuman Kengashining 20-“Yo‘lchilar” saylov okrugidan saylangan deputati G.Allanova hamda Kengash kotibiyati mudiri M.Kamolova tomonidan Uchquduq tuman maktabgacha va maktab ta’limi bo‘limiga qarashli 10-sonli umumiy o‘rta ta’lim maktabida O‘zbekiston Respublikasining “Mehnatni muhofaza qilish to‘g‘risida”gi O‘RQ-410-son Qonuni ijrosi yuzasidan o‘rganish ishlari olib borildi.

O‘rganish davomida ta’lim muassasasida pedagog va texnik xodimlar uchun yaratilgan mehnat sharoitlari, mehnatni muhofaza qilish va texnika xavfsizligi bo‘yicha olib borilayotgan ishlar, xodimlarning mehnat xavfsizligi yuzasidan bilim va ko‘nikmalarini oshirishga qaratilgan tadbirlar holati tahlil qilindi.

Shuningdek, mehnatni muhofaza qilish bo‘yicha yo‘riqnoma va jurnal hujjatlarining yuritilishi, xodimlarning dastlabki hamda davriy yo‘riqnomalardan o‘tkazilishi, yong‘in xavfsizligi qoidalariga rioya etilishi, favqulodda vaziyatlarda harakat qilish tartiblari bo‘yicha amalga oshirilayotgan ishlar ham ko‘zdan kechirildi.

Maktab hududi, sinf xonalari, yordamchi binolar va texnik xizmat ko‘rsatish xonalarida xavfsizlik talablariga rioya etilishi, elektr jihozlaridan foydalanish holati, sanitariya-gigiyena talablarining bajarilishi hamda xodimlar va o‘quvchilar uchun xavfsiz muhit yaratish masalalariga alohida e’tibor qaratildi.

O‘rganish yakunlari bo‘yicha mavjud holat yuzasidan mas’ul mutasaddilar bilan muloqot o‘tkazilib, aniqlangan ayrim kamchiliklarni bartaraf etish, mehnatni muhofaza qilish bo‘yicha profilaktik ishlarni kuchaytirish hamda qonunchilik talablarining to‘liq va sifatli ijrosini ta’minlash yuzasidan tegishli tavsiyalar berildi.

Mazkur yo‘nalishdagi o‘rganishlar deputatlik nazorati doirasida davom ettirilib, ta’lim muassasalarida xavfsiz va sog‘lom mehnat sharoitlarini yaratish, xodimlar hamda o‘quvchilarning hayoti va salomatligini muhofaza qilishga qaratilgan ishlar muntazam monitoring qilib boriladi.