Xalq deputatlari Boyovut tuman Kengashi deputati A.Odilov tomonidan saylovchilar bilan navbatdagi uchrashuv tashkil etildi.

Uchrashuv davomida yosh avlod tarbiyasi, ularning sifatli ta’lim olishi uchun yaratilayotgan imkoniyatlar hamda farzandlarning bo‘sh vaqtlarini mazmunli tashkil etish masalalariga alohida e’tibor qaratildi. Jumladan, maktablarda tashkil etilayotgan bolalar oromgohlari, turli to‘garaklar va ma’naviy-ma’rifiy tadbirlarning yoshlar tarbiyasidagi ahamiyati muhokama qilindi.

Shuningdek, farzandlarning kelajak kasbini tanlashi va oliy ta’lim muassasasiga kirish jarayonida ota-onalarning o‘rni, ularning qiziqishi va istaklarini inobatga olgan holda to‘g‘ri yo‘naltirish masalalari yuzasidan fikr almashildi.

Tadbir davomida mahallaning faxriy nuroniylari, hudud ravnaqiga munosib hissa qo‘shgan fidoyi insonlarning hayot yo‘li va ibratli faoliyati ham e’tirof etildi. Ular xotirasiga bag‘ishlangan videorolik namoyish etilib, nuroniylarning jamiyat hayotidagi o‘rni va xizmatlari yodga olindi.

Uchrashuv samimiy va ochiq muloqot ruhida o‘tib, ishtirokchilar tomonidan bildirilgan taklif va mulohazalar tinglandi. Kelgusida yoshlar tarbiyasi va ta’lim sifati bilan bog‘liq masalalarda hamkorlikni yanada kuchaytirish yuzasidan kelishib olindi.