Xalq deputatlari tuman Kengashi deputati B.Avliyoqulov o‘z saylov okrugidagi Mingbuloq mahallasida amalga oshirilayotgan
irrigatsiya va infratuzilma ob’ektlari qurilishi ishlarini o‘rganish maqsadida hududda bo‘ldi. Tashrif davomida mahallada aholi tomorqalari va ekin maydonlarini suv bilan ta’minlash samaradorligini oshirishga qaratilgan suv lotoklari qurilishi ishlarining
borishi bilan yaqindan tanishildi. O‘rganish jarayonida aniqlanishicha, hozirgi kunda hududda beton ariqlar va suv lotoklarini barpo etish ishlari jadal sur’atlarda olib borilmoqda. Qurilish ishlariga zarur texnika va qurilish materiallari jalb qilingan bo‘lib, belgilangan reja asosida ishlar izchil davom ettirilmoqda. Deputat qurilish ishlarini amalga oshirayotgan mutasaddilar bilan suhbatlashib, bajarilayotgan ishlar sifati, qurilish muddatlari hamda aholi uchun kutilayotgan ijobiy natijalar xususida ma’lumot
oldi. Ta’kidlanganidek, mazkur loyihaning amalga oshirilishi suv resurslaridan samarali foydalanish, suv yo‘qotilishining oldini olish va aholining tomorqa yerlarini sug‘orish imkoniyatlarini yanada kengaytirishga xizmat qiladi. Shuningdek, mahalla aholisi bilan muloqot davomida suv ta’minoti bilan bog‘liq masalalar, tomorqalardan unumli foydalanish hamda hudud infratuzilmasini yanada yaxshilash yuzasidan fikr va takliflar tinglandi. Fuqarolar tomonidan mazkur qurilish ishlari kelgusida suv ta’minotini yaxshilashda muhim ahamiyat kasb etishi qayd etildi.