Xalq deputatlari Chilonzor tumani Kengashi deputati Xidiyatullina Rima Rashitovna tomonidan hududdagi yo‘l harakati xavfsizligini ta’minlash va mavjud muammolarni bartaraf etish yuzasidan Toshkent shahar IIBB Yo‘l harakati xavfsizligi boshqarmasiga 2026-yil 31-martdagi 20-ds-413-26-sonli deputatlik so‘rovi yuborilgan edi.

Deputatlik so‘rovida Qatartol 1-tor ko‘chasida joylashgan 7-sonli tug‘ruqxona kompleksi, Favqulodda vaziyatlar boshqarmasi hamda 79 va 179-sonli maktablar qarshisida yuzaga kelayotgan tirbandliklar va transport vositalarining to‘xtab turishi bilan bog‘liq holatlarning oldini olish, shuningdek, Qatartol 1-tor ko‘chasida sun’iy notekisliklar hamda 2-Qatartol ko‘chasidagi “Bolalar maydonchasi” qarshisida “To‘xtash taqiqlanadi” yo‘l belgilarini o‘rnatish masalalari ko‘tarilgan.

Deputatlik so‘rovi natijasida murojaatda ko‘rsatilgan hududlar Toshkent shahar IIBB Yo‘l harakati xavfsizligi boshqarmasi mas’ul xodimlari tomonidan atroflicha o‘rganildi.

O‘rganish yakunlariga ko‘ra, Qatartol 1-tor ko‘chasidagi 7-sonli tug‘ruqxona kompleksi, Favqulodda vaziyatlar boshqarmasi hamda 79 va 179-sonli maktablar qarshisida harakat xavfsizligini ta’minlash va tirbandliklarni kamaytirish maqsadida 3.27 — “To‘xtash taqiqlanadi” yo‘l belgilari o‘rnatildi.

Shuningdek, 2-Qatartol ko‘chasidagi “Bolalar maydonchasi” qarshisida yo‘l-transport hodisalarining oldini olish va harakat xavfsizligini ta’minlash maqsadida 3.27 — “To‘xtash taqiqlanadi” yo‘l belgilarini o‘rnatish bo‘yicha Toshkent shahar Ekspluatatsiya montaj boshqarmasiga tegishli ko‘rsatma berildi.

Natijada, deputatlik so‘rovida ko‘tarilgan masalalar vakolatli tashkilot tomonidan o‘rganilib, hududda yo‘l harakati xavfsizligini ta’minlash va tirbandliklarni kamaytirishga qaratilgan tegishli amaliy choralar ko‘rildi.