Xalq deputatlari Muzrabot tumani Kengashiga 14-Xalqabod saylov okrugidan saylangan deputat Ollomurodov Otabek hamda tuman Kengashi kotibiyati bosh mutaxassisi B. Xoliqov tomonidan “Shaffof” mahallasida Xalq deputatlari Muzrabot tumani Kengashining 2026- yil 6-maydagi VII-21-54-8-115-K/26-sonli qarori ijrosi yuzasidan deputatlik nazorat-tahlil tadbiri o‘tkazildi.

Mazkur qaror bilan O‘zbekiston Respublikasi Vazirlar Mahkamasining 2024- yil 11- oktyabrdagi 665-sonli qaroriga muvofiq, tuman Obodonlashtirish boshqarmasi tasarrufidagi ichki yo‘llarni saqlash va joriy ta’mirlash ishlari bo‘yicha 2026-yil uchun dastlabki manzilli ro‘yxat tasdiqlangan bo‘lib, unga asosan “Shaffof” mahallasining “Gazchilar”, “Axunboboyev” hamda “Navobod-1”, “Navobod-2”, “Navobod-3” ko‘chalarini belgilangan hajmda asfalt-beton qoplamasi yotqizish orqali ta’mirlash ishlari rejalashtirilgan.

O‘rganish jarayonida tuman Obodonlashtirish boshqarmasi tomonidan “Navobod-1”, “Navobod-2” va “Navobod-3” ko‘chalarida amalga oshirilayotgan qurilish-ta’mirlash ishlarining borishi joyida ko‘zdan kechirildi. Ayni paytda ushbu ko‘chalarda tosh-shag‘al aralashmasini yoyish va tekislash ishlari yakunlanib, asfalt-beton qoplamasini yotqizish uchun zarur tayyorgarlik ishlari olib borilmoqda.

Deputatlik nazorati davomida bajarilayotgan ishlar sifati, qurilish texnologiyalariga rioya qilinishi hamda belgilangan muddatlarda yakunlanishi yuzasidan mas’ul mutasaddilarga tegishli tavsiya va ko‘rsatmalar berildi.

Ta’kidlanganidek, xalq deputatlari tuman Kengashi deputatlari mazkur qaror ijrosini muntazam nazorat qilib borib, har bir bosqichda amalga oshirilayotgan ishlar sifati va samaradorligini o‘rganishda davom etadilar.

Ushbu loyihaning to‘liq va sifatli amalga oshirilishi mahalla ichki yo‘llarining holatini yaxshilash, transport harakati xavfsizligini ta’minlash hamda aholi uchun yanada qulay va zamonaviy infratuzilmani shakllantirishga munosib hissa qo‘shadi.