TIBBIYOT MUASSASALARIDA PULLI XIZMAT KO‘RSATISH TARTIBI BELGILANDI

📌 O‘zbekiston Respublikasi Vazirlar Mahkamasining 2025-yil 11-noyabrdagi 718-son qarori bilan “O‘zbekiston Respublikasi Sog‘liqni saqlash vazirligi tizimidagi tibbiyot muassasalarida pulli xizmat ko‘rsatish tartibi to‘g‘risida”gi Nizom tasdiqlandi.

⚖️ Mazkur qaror bilan tibbiyot muassasalarida pulli tibbiy xizmatlarni tashkil etish, xizmatlar tariflarini shakllantirish, pulli xizmatlardan tushgan mablag‘lardan foydalanish, mijozlarni qabul qilish hamda ular bilan shartnomalar tuzish tartibi belgilandi.

🔹 Pulli xizmat qachon ko‘rsatiladi?
📍 Mijoz rejali tibbiy yordam olish uchun tegishli yo‘llanmasiz, o‘z xohishiga ko‘ra tibbiyot muassasasiga murojaat qilganida, tibbiy yordam belgilangan tartibda pulli asosda ko‘rsatiladi.
📍 Davlat tomonidan birlamchi tibbiy-sanitariya yordami muassasalarida kafolatlangan paket doirasida bepul ko‘rsatiladigan xizmatlardan tashqari xizmatlar qo‘shimcha xizmat hisoblanib, pulli asosda ko‘rsatilishi mumkin.

💳 To‘lov tartibi
Tibbiy xizmat uchun to‘lov tasdiqlangan narxnoma asosida amalga oshiriladi. Mijozlar, odatda, tibbiyot muassasasiga murojaat qilishdan oldin xizmat haqini to‘liq to‘lash shartlarida qabul qilinadi. To‘lov bank, nazorat-kassa apparati, terminal yoki elektron to‘lov tizimlari orqali amalga oshirilishi mumkin.

🛡 FUQAROLAR HUQUQLARI MUHIM!
❗️ Aholiga qonunchilikda belgilangan bepul tibbiy xizmatlarni asossiz ravishda pulli xizmat sifatida taklif etish mumkin emas.

📋 Tibbiy xizmatlar ko‘rsatishda shaffoflikni ta’minlash, xizmatlar narxlari haqida aholiga ochiq va tushunarli ma’lumot berish hamda fuqarolarning huquq va qonuniy manfaatlarini himoya qilish muhim ahamiyatga ega.

🤝 Sifatli tibbiy xizmat — inson salomatligi va huquqlarini ta’minlashning muhim kafolatidir!

📚 Huquqiy asos: O‘zbekiston Respublikasi Vazirlar Mahkamasining 2025-yil 11-noyabrdagi 718-son qarori.