Xalq deputatlari Shayxontohur tuman Kengashi deputati B.Boborajabov tomonidan "Xadra" mahalla fuqarolar yig'inida ijtimoiy-ma'naviy muhitni yaxshilash hamda ijtimoiy himoyaga muhtoj aholini qo'llab-quvvatlash bo'yicha fuqarolar bilan uchrashuv tashkil etildi.
Uchrashuvda mahalla fuqarolar yig'ini raisi, mahalla faollari va fuqarolar ishtirok etib, asosiy faoliyatga oid 24 ta savolnoma bo'yicha mahalladagi ijtimoiy-ma'naviy vaziyat, aholi o'rtasida ma'naviy-ma'rifiy ishlarni kuchaytirish, shuningdek kam ta'minlangan oilalar, nogironligi bo'lgan shaxslar, yolg'iz keksalar va ijtimoiy himoyaga muhtoj boshqa fuqarolarni qo'llab-quvvatlash masalalari batafsil muhokama qilindi.
Shuningdek, uchrashuv davomida ijtimoiy himoyaga muhtoj fuqarolardan birining turar-joyi eskirib, ta'mirtalab holatga kelgani yuzasidan murojaat bildirildi. Ko'tarilgan ushbu masala alohida e'tiborga olinib, fuqaroning uy-joy sharoitini o'rganish va uni ta'mirlash imkoniyatlarini ko'rib chiqish yuzasidan tegishli tashkilotlarga topshiriq berildi.
Uchrashuvda bildirilgan barcha murojaat va takliflar o'rganilib, tegishli mas'ul tashkilotlarga yo'naltirildi hamda ularning ijrosi deputat tomonidan shaxsan nazoratga olinishi ma'lum qilindi.