Xalq deputatlari tuman Kengashi deputati tomonidan Chinobod mahallasida barpo etilayotgan 90 o‘rinli zamonaviy maktabgacha ta’lim tashkiloti qurilish ishlari joyiga chiqib o‘rganildi. O‘rganish davomida qurilish obyekti hududida amalga oshirilayotgan ishlarning borishi, bino-inshootning loyiha talablariga muvofiqligi, qurilish materiallarining sifati hamda ishlarning belgilangan reja-grafik asosida olib borilishi atroflicha ko‘zdan kechirildi. Shuningdek, qurilish jarayonida mehnat xavfsizligi qoidalariga rioya etilishi, ichki va tashqi muhandislik tarmoqlarining o‘rnatilishi, bolajonlar uchun yaratiladigan sharoitlar – o‘quv xonalari, o‘yin maydonchalari hamda sanitariya-gigiyena talablariga moslik masalalariga alohida e’tibor qaratildi. Deputat mas’ul ishchilar bilan suhbat davomida ishlarning sifatli va o‘z vaqtida yakunlanishi, ortiqcha kechikishlarga yo‘l qo‘ymaslik hamda qurilish jarayonida aniqlangan ayrim kamchiliklarni bartaraf etish yuzasidan tegishli tavsiya va ko‘rsatmalar berdi. Mazkur 90 o‘rinli maktabgacha ta’lim tashkiloti foydalanishga topshirilgach, Chinobod mahallasi aholisi uchun katta qulaylik yaratib, bolalarning sifatli ta’lim-tarbiya olishiga xizmat qiladi. Deputat tomonidan ushbu ijtimoiy ahamiyatga ega obyekt qurilishini doimiy nazoratga olish va jarayonni joyiga chiqib tahlil qilib borilishi ta’kidlandi.