Xalq deputatlari G‘ozg‘on shahar Kengashi raisi Z.Ro‘ziyev hamda Xalq deputatlari shahar Kengashi Kotibiyat mudiri F.Hojiyev, shuningdek, Kotibiyat bosh mutaxassislari D.Murodov va H.Pardayevlar tomonidan shahardagi “Guliston” MFY hududida aholiga ko‘rsatilayotgan ijtimoiy xizmatlar holati atroflicha o‘rganildi. 

O‘rganish jarayonida O‘zbekiston Respublikasi Prezidentining “Aholiga ijtimoiy xizmatlar va yordamlar ko‘rsatish tizimini yanada takomillashtirish chora-tadbirlari to‘g‘risida”gi PQ-319-son qarori ijrosi doirasida amalga oshirilayotgan ishlar alohida e’tiborga olindi.

Xususan, ijtimoiy ehtiyojmand oilalarni aniqlash, ularning muammolarini o‘rganish, kam ta’minlangan oilalarga ijtimoiy nafaqalar va moddiy yordamlarni o‘z vaqtida hamda adolatli tayinlash va to‘lash tizimi batafsil tahlil qilindi.

Shuningdek, ijtimoiy xodim tomonidan aholiga ko‘rsatilayotgan xizmatlarning sifati, murojaatlar bilan ishlash jarayoni, hujjatlarning yuritilishi hamda ijtimoiy himoyaga muhtoj fuqarolar bilan individual ishlash holati ham o‘rganildi.

O‘rganish davomida ayrim yo‘nalishlarda aniqlangan kamchiliklarni bartaraf etish, xizmatlar sifatini yanada oshirish, aholining ehtiyojlariga tezkor va samarali javob berish yuzasidan tegishli mas’ullarga aniq topshiriq va tavsiyalar berildi.

Mas’ullar tomonidan ijtimoiy xizmatlar tizimini yanada takomillashtirish, aholining turmush darajasini yaxshilash hamda ijtimoiy qo‘llab-quvvatlash choralarini kuchaytirish bo‘yicha zarur chora-tadbirlar belgilab olindi.