Xalıq deputatları Bozataw rayonlıq Keńesiniń háptelik is rejesine muwapıq, rayon aymaǵındaǵı sociallıq taraw obyektileriniń jaǵdayın hám gúz-qıs máwsimine tayarlıǵın úyreniw boyınsha bir qansha is-ilajlar alıp barmaqta.

Usınday úyreniwlerden biri búgin Bozataw rayonı «Aspantay» APJ «Porıltaw» máhállesinde jaylasqan tez medicinalıq járdem kórsetiw punktinde ótkerildi. Úyreniw jumıslarına Xalıq deputatları Bozataw rayonlıq Keńesiniń 13-sanlı «Porıltaw» saylaw okruginen saylanǵan deputatı K. Bisenov qatnastı.

Úyreniw dawamında punkttiń gúz-qıs máwsimine tayarlıǵı, jılıtıw sistemasınıń jaǵdayı hám qazanxananıń tayarlıǵı kórip shıǵıldı.

Úyreniw nátiyjesinde jılıtıw qazanxanası jumısqa tayar jaǵdayda ekenligi, sonıń menen birge qazanxananıń sırtqı bólimlerinde jeńil kosmetikalıq jumıslardı alıp barıw zárúrligi anıqlandı.

Anıqlanǵan kemshiliklerdi saplastırıw hám punktti gúz-qıs máwsiminde tolıq tayar halda isletiw boyınsha tiyisli ilajlardı kóriw belgilenip, bul másele deputat tárepinen nazaratqa alındı.

Deputatlıq úyreniwlerdiń tiykarǵı maqseti — puqaralarǵa sapalı medicinalıq járdem kórsetiw ushın zárúr sharayatlar jaratıw hám sociallıq obyektlerdiń máwsimge tayarlıǵın támiyinlew.