— Prezidentimizning BMT minbaridagi nutqida ilgari surilgan tashabbuslar mintaqaviy va global muammolarga yechimlar taqdim etishi bilan alohida ahamiyatga ega. Xususan, BMT Xavfsizlik Kengashini transformatsiya qilish va uning tarkibini kengaytirish borasidagi taklif bugungi geosiyosiy voqelikning
talabidir. Chunki dunyo tubdan o‘zgardi, ammo xalqaro institutlar hali ham 1945-yil tuzilmasida qolmoqda. Rivojlanayotgan davlatlarning manfaatlarini himoya qilish, xalqaro institutlarning samaradorligini oshirish zamon talabiga aylangan bir paytda O‘zbekiston ushbu jarayonning faol ishtirokchisi sifatida o‘z o‘rnini mustahkamlashi muhim ahamiyat kasb etadi. 

Tabiiyki, xalqaro tizimni isloh qilish mintaqaviy hamkorlikni mustahkamlashdan boshlanadi. Shu bois, Prezidentimiz Markaziy Osiyodagi o‘zgarishlarga alohida to‘xtaldi. So‘nggi 8 yilda mintaqamizda ro‘y bergan tarixiy o‘zgarishlar – yopiq chegaralarning ochilishi, savdo hajmining besh barobar oshishi, qo‘shma investitsiya jamg‘armalari va sanoat zonalarining tashkil etilishi «Yangi Markaziy Osiyo» konsepsiyasining amaliy natijasidir. 

Bosh Assambleyaning mintaqaviy integratsiyani qo‘llab-quvvatlashga doir rezolyusiyasi qabul qilinsa, mintaqamiz global iqtisodiyotga yanada chuqur integratsiyalashadi va bu barcha qo‘shni davlatlar manfaatiga mos keladi. 

Mintaqaviy barqarorlik esa Afg‘oniston masalasini hal etmasdan turib to‘liq bo‘lmaydi. Prezidentimizning bu davlatni yakkalab qo‘ymaslik, unda katta infratuzilma loyihalarini amalga oshirish chaqirig‘i strategik ahamiyatga ega. Afg‘onistonning iqtisodiy tiklanishi terrorizm va narkotrafikka qarshi kurashda eng samarali vosita bo‘ladi. 

Afg‘oniston orqali transport va energetika koridorlarini rivojlantirish bo‘yicha BMT rezolyusiyasini qabul qilish taklifi esa bu mamlakatni mintaqaviy iqtisodiy tizimga qayta integratsiyalashning amaliy mexanizmini yaratadi. Bu nafaqat afg‘on xalqi, balki butun mintaqa farovonligiga xizmat qiladi. 

Xavfsizlik masalasida so‘z ketganda, terrorizmga qarshi kurashishdagi tashabbuslarimiz alohida e’tiborga loyiq. Reabilitatsiya va qayta integratsiya bo‘yicha Mintaqaviy Kengashni Xalqaro kompetensiyalar markaziga aylantirish taklifi jahon tajribasida misli ko‘rilmagan loyihadir. Bu markaz orqali muammoli hududlardan qaytarilgan minglab shaxslarni jamiyatga moslashtirish tajribasi butun dunyoga tarqaladi. BMT Terrorizmga qarshi kurash boshqarmasining mintaqaviy ofisini O‘zbekistonda ochish esa mintaqamizni global antiterror kurashining muhim markaziga aylantiradi. 

Xulosa qilib aytganda, Prezidentimizning BMT minbaridagi tarixiy nutqi O‘zbekistonning global mas’uliyatni o‘z zimmasiga olishga tayyorligini, xalqaro hamjamiyatning teng huquqli a’zosi sifatida dunyo taraqqiyotiga hissa qo‘shish xohish-irodasini yaqqol namoyon etdi.  

Xalq deputatlari Taxiatosh tumani Kengashi deputati D.Artikov