Búgin Prezident Shavkat Mirziyoevtiń basshılıǵında máhálle sistemasın bunnan bılay da jetilistiriw hám orınlarda jumıslardı nátiyjeli shólkemlestiriw máseleleriboyınsha videoselektor májilisi bolıp ótti. Máhállede "jetilik" sisteması engizilip, kredit, subsidiya, kompensaciya, materiallıq járdem ajıratıw sıyaqlı 100 den aslam xızmetler máhálle dárejesine túsirilgeniliginen jumıssızlıq dárejesi 2 esege qısqardı. Sonday-aq, 3,5 mıń máhálleniń kelbeti zamanagóy kóriniske keldi. Máhálle baslıqlarınıń wákillik múddeti 3 jıldan 5 jılǵa sozdırıldı. Olardıń basshılıǵında "jetilik" vertikal sisteması jaratıldı, jeterli sharayat, resurs hám wákillikler berildi. Máhálledegi hár bir imkaniyattı joybarǵa aylandırıp, jumıs ornın jaratıw ushın máhállelerge bankir
hám salıqshılar baylanıstırıldı, infrastrukturaǵa da ayrıqsha qarjı ajıratılmaqta. Mámleketimiz basshısı bulardan nátiyjeli paydalanıp, nátiyje kórsetip atırǵan máhálleler kóp ekenligi, biraq ayırımları birden-bir jámáát
bolıp islesiwdi elege shekem úyrenbegenin atap ótti. Prezident máhállelerde infrastrukturanı jaqsılaw máselelerine ayrıqsha itibar qarattı hám wálayat hákimleriniń ózi de 2 ewden, rayon hákimleri bolsa 1 den awır máhálleni belgilep, olarǵa 5 milliard sumnan baǵdarlawı, jáne 236 máhálle xalqınıń turmısında keskin ózgeris islewi shárt ekenligi kórsetip ótildi. Rayon hákimleri berilip atırǵan qarjıdan aqılǵa uǵras paydalanıp, "máhálle
jetiligi" menen jańa qatnaslar tiykarında islewi zárúr ekenligi atap ótildi. Máhállelerge qarjı ajıratılıp, sharayat jaratılǵanı sebepli usı jıldıń ózinde 237 mıń shańaraq kámbaǵallıqtan shıqtı. Biraq házirgi waqıtta 28 kishi rayonda jumıssızlıqqa qarsı jeterli ilaj kórilmey atırǵanı atap ótildi. Sonday-aq májiliste máhállelerdegi sociallıq ortalıq hám jaslar tárbiyası boyınsha sheshim tabılıwı kerek bolǵan bir qatar máseleler kórsetip ótildi. Shańaraq qurıw bul - tek ǵana ózi emes, al ómirlik joldası hám perzentleri aldındaǵı úlken juwapkershilik ekenin jaslarǵa túsindiriw zárúr ekenligin atap ótti. Endi "jetilik", máhálle xalqı jasıl aymaq jaratıw baslaması menen shıqsa, rayon hákimi 10 sotixqa shekem jer maydanın ajıratıp beredi. "Reformalarımızdıń bosaǵası bolǵan hár bir máhállege Jańa Ózbekstan nápesin alıp kiriw, bárinen burın, "máhálle jetiligi"niń birden-bir jámáát bolıp islesiwine tikkeley baylanıslı,"- dedi mámleketimiz basshısı. Sonlıqtan, máhálle baslıǵı basshılıǵındaǵı "jetilik"tiń hár bir wákili ózine juwapkershilik alıp, joqarıda qoyılǵan wazıypalardıń orınlanıwı boyınsha múrájat penen shıǵıp, bir jıllıq baǵdarlamasın xalıqqa járiyalawı áhmiyetli ekenligi atap ótildi. Biz, xalıq wákilleri sıpatında, Mámleketimiz basshısı tárepinen alǵa qoyılıp atırǵan bunday baslamalardı qollap-quwatlaǵan halda aymaqlarda nátiyjeli shólkemlestiriliwinde jámiyetlik qadaǵalawdı alıp baramız.