Gabala sammiti: O‘zbekistonning birdamlik sari qadamlari

Yaqinda Ozarbayjonning Gabala shahrida bo‘lib o‘tgan Turkiy davlatlar tashkilotining navbatdagi sammiti turkiy xalqlar o‘rtasidagi hamkorlik va birdamlikni yanada mustahkamlash yo‘lida tarixiy qadam bo‘ldi. Sammitda O‘zbekiston Respublikasi Prezidenti Shavkat Mirziyoyev so‘zga chiqib, jahon siyosiy maydonida turkiy mamlakatlarning o‘rni va ta’sirini oshirish, iqtisodiy, gumanitar va madaniy sohalardagi hamkorlikni kuchaytirishga doir bir qator muhim va dolzarb tashabbuslarni ilgari surdi. Bu tashabbuslar nafaqat mintaqa, balki butun dunyo miqyosida katta qiziqish uyg‘otmoqda. Prezidentimizning har bir so‘zida samimiyat, amaliy yondashuv va strategik fikr mujassam bo‘lib, ular turkiy davlatlar o‘rtasidagi munosabatlarni yangi bosqichga olib chiqishga qaratilgan.

Shavkat Mirziyoyev tomonidan ilgari surilgan asosiy yo‘nalishlar quyidagilardan iborat:

Turkiy davlatlarning iqtisodiy integratsiyasini chuqurlashtirish: Sammitda O‘zbekiston rahbari o‘zaro savdo aylanmasini ko‘paytirish, transport-kommunikatsiya yo‘nalishlarini yaxshilash, o‘zaro investisiyaviy loyihalarni qo‘llab-quvvatlash zarurligini ta’kidladi. Bu orqali mintaqada barqaror iqtisodiy o‘sishni ta’minlash imkoni yaratiladi.Turkiy madaniy merosni asrab-avaylash va rivojlantirish: Prezidentimiz turkiy xalqlarning boy tarixiy merosi, tili va madaniyatini saqlash, yoshlar o‘rtasida milliy o‘zlikni kuchaytirish bo‘yicha qo‘shma dasturlar ishlab chiqish tashabbusini bildirdi. Bu esa yosh avlodda tarixiy xotirani mustahkamlaydi, milliy g‘urur va birdamlikni oshiradi.

Xalqaro siyosiy maydonda yagona pozisiya:

Turkiy mamlakatlar xalqaro muammolarga nisbatan o‘z pozisiyalarini muvofiqlashtirish, umumiy manfaatlar yo‘lida birlashish orqali jahon siyosiy jarayonlarida ta’sir kuchini oshirishlari zarurligi alohida qayd etildi. Innovatsiya va texnologiyalar sohasida hamkorlik: Yangi texnoligiyalar, raqamlashtirish va “yashil” iqtisodiyotga o‘tish masalalari ham kun tartibida bo‘ldi. O‘zbekiston ushbu sohalarda qo‘shma ilmiy-tadqiqot loyihalarini amalga oshirishni taklif etdi.Shubhasiz, ushbu tashabbuslar nafaqat mamlakatlarimiz o‘rtasidagi o‘zaro ishonchni mustahkamlaydi, balki xalqlarimiz farovonligi va taraqqiyotiga xizmat qiladi. Prezidentimiz tomonidan bildirilgan har bir fikr ortida ulkan mas’uliyat va kelajak uchun qat’iy ishonch mujassam. Bugungi kunda O‘zbekiston Respublikasi tashqi siyosatda ochiqlik, pragmatizm va amaliy hamkorlikka tayangan holda, turkiy dunyo bilan munosabatlarni yanada kengaytirishga, uni aniq mazmun va manfaat bilan boyitishga intilmoqda. Bu yo‘lda biz, xalq vakillari — deputatlar ham o‘z hissamizni qo‘shishga tayyormiz.

Shavkat Mirziyoyev rahnamoligida ilgari surilayotgan tashabbuslar — bu buyuk kelajakka yo‘l, turkiy xalqlarning umumiy taraqqiyoti, tinchligi va farovonligiga xizmat qiladigan strategiyadir.

🇺🇿Xalq deputatlari Navoiy shahar Kengashi deputati Ismatov Muhammad Rustam o‘g‘li