Xalq deputatlari Chilonzor tumani Kengashining Ijtimoiy soha, yoshlar siyosati, madaniyat va sport masalalari bo‘yicha doimiy komissiyasi tomonidan yuborilgan o'rganish xatiga Tumanlararo 2-son teri-tanosil kasalliklari dispanseri ma’muriyati tomonidan javob taqdim etildi.
Javobda dispanser binolari 2024-yilda joriy ta’mirlangani, tom qismi, deraza va eshiklar, suv va kanalizatsiya tarmoqlari, elektr ta’minoti hamda hudud yoritish tizimlari yaxshi holatda ekani qayd etilgan. Shuningdek, bino hududi va xonalari videokuzatuv tizimi bilan ta’minlangan.
Kuz-qish mavsumiga tayyorgarlik doirasida 2 dona isitish uzeli ta’mirlanib, yuqori bosimda yuvilgan, ushbu ishlar uchun dispanserning o‘z mablag‘lari hisobidan 7 mln 900 ming so‘m mablag‘ yo‘naltirilgan.
Shuningdek, elektr ta’minotini barqarorlashtirish maqsadida 25 kVt/soat quvvatli quyosh paneli o‘rnatilgan, ichimlik suvi ta’minoti yaxshilangan va zamonaviy hisoblagichlar hamda raqamli billing tizimi joriy etilgan.
O‘rganish davomida kuz-qish mavsumida markazlashgan issiqlik ta’minotida suv bosimi va harorat bilan bog‘liq muammolar mavjudligi ham qayd etilgan. Mazkur masala yuzasidan hududiy issiqlik ta’minoti korxonasiga murojaatlar yo‘llangani ma’lum qilingan.
Bundan tashqari, yong‘in xavfsizligi, favqulodda vaziyatlarning oldini olish va xodimlarni tegishli holatlarda to‘g‘ri harakat qilishga o‘rgatish bo‘yicha ham zarur choralar ko‘rilmoqda.
Xat asosida o‘tkazilgan o‘rganish natijalari kelgusida mavjud muammolarni bartaraf etish va tibbiy xizmatlar uzluksizligini ta’minlashga qaratilgan ishlarni kuchaytirishga xizmat qiladi.