POLVONTOSHDA YANA BIR EZGU ORZU USHALMOQDA!

“Mo‘nka” ko‘chasining 1,2 kilometr qismiga asfalt yotqizilmoqda

Bandixon tumanining Polvontosh mahallasida bunyodkorlik va obodonlashtirish ishlari izchil davom etmoqda.

Aholi uchun uzoq yillardan buyon kutilgan “Mo‘nka” ko‘chasining 1,2 km qismida asfaltlash ishlari tuman obodonlashtirish boshqarmasi tomonidan amalga oshirilmoqda.

Mazkur jarayonni Xalq deputatlari Bandixon tumani kengashi deputati, tuman hokimi Abdumalik Allamuradov ko‘zdan kechirib, ishlarning sifatli va belgilangan talablar asosida olib borilishini nazorat qildi.

“Ushbu asfaltlash Polvontoshliklar uchun asriy orzu bo‘lgan. Asfalt sifatli bo‘lishi, uzoq yillar xizmat qilishi kerak”, — dedi tuman hokimi A. Allamuradov.

Bu shunchaki yo‘l emas — odamlarning yillar davomida kutgan orzusi, mahalla qiyofasining o‘zgarishi va aholi uchun yanada qulay sharoit yaratish yo‘lidagi muhim qadamdir.