Qadaqsin mahalla fuqarolar yig`ini hududida joylashgan ko`p qavatli uylarda istiqomat qiluvchi fuqarolar tomonidan xonadon ichidagi suv quvurlaridan suv toshib ketayotganligi bo`yicha murojaat kelib tushdi. Ushbu murojaat aholining kundalik turmushi va yashash sharoitiga salbiy ta`sir ko`rsatayotganligi inobatga olinib, zudlik bilan o`rganish ishlari tashkil etildi. Mazkur murojaat yuzasidan tuman Kengashi deputatlari E.Qurbonov hamda Yo.Tadjibaevalar mahallada bo`lib, fuqarolarning xonadonlariga borgan holda mavjud holatni joyida o`rgandilar. O`rganish jarayonida quvur tizimlaridagi nosozliklar, ularning kelib chiqish sabablari hamda muammoni bartaraf etish bo`yicha tegishli tushuntirish ishlari olib borildi. Shuningdek, aholi bilan ochiq muloqot o`tkazilib, kommunal xizmatlardan foydalanish
qoidalari, uy ichidagi muhandislik tarmoqlarini asrash va o`z vaqtida ta`mirlash masalalari bo`yicha tavsiyalar berildi. Murojaatda ko`tarilgan muammoni hal etish yuzasidan tegishli tashkilotlar bilan hamkorlik qilish bo`yicha takliflar ishlab chiqildi. Aholi murojaatlarini o`z vaqtida ko`rib chiqish va joyida hal etish fuqarolarning yashash sharoitini yaxshilashga, mahallalarda ijtimoiy barqarorlikni ta`minlashga xizmat qiladi.