Prezident Murojaatnomasi mazmun-mohiyatiga bag‘ishlangan davra suhbati bo‘lib o‘tdi

Xalq deputatlari Termiz tuman Kengashi deputati, O‘zbekiston Xalq demokratik partiyasi Termiz tuman Kengashi raisi, G. Shafoatova ishtirokida O‘zbekiston Respublikasi Prezidenti Shavkat Miromonovich Mirziyoyevning Oliy Majlis va O‘zbekiston xalqiga yo‘llagan Murojaatnomasining mazmun-mohiyatiga bag‘ishlangan davra suhbati bo‘lib o‘tdi.

Mazkur tadbirda Murojaatnomada belgilab berilgan ustuvor yo‘nalishlar, mamlakatimizni ijtimoiy-iqtisodiy rivojlantirish, xalq farovonligini oshirishga qaratilgan keng ko‘lamli islohotlar, shuningdek, mahallaning jamiyatdagi o‘rni va nufuzini yanada mustahkamlash masalalari atroflicha muhokama qilindi. Xususan, aholi turmush darajasini yaxshilash, ijtimoiy himoyani kuchaytirish, bandlikni ta’minlash, yoshlar va xotin-qizlar bilan manzilli ishlash, ularning tashabbuslarini qo‘llab-quvvatlash masalalariga alohida e’tibor qaratildi.

Davra suhbati davomida Prezidentimiz tomonidan ilgari surilgan tashabbuslar, davlat boshqaruvi tizimini takomillashtirish, mahalla institutining vakolat va mas’uliyatini oshirishga qaratilgan islohotlarning mazmun-mohiyati ishtirokchilarga keng va batafsil tushuntirib berildi. Shuningdek, mahalla tizimi orqali jamiyatdagi ijtimoiy muammolarni joyida hal etish, aholining faolligini oshirish, sog‘lom ijtimoiy-ma’naviy muhitni shakllantirish muhim vazifa ekani ta’kidlandi.

Tadbir yakunida Murojaatnomada belgilangan vazifalarni hayotga tatbiq etishda davlat organlari, jamoatchilik vakillari va fuqarolarning hamjihatligi muhim ahamiyat kasb etishi, jamiyatni yuksaltirish va Yangi O‘zbekistonni barpo etish yo‘lida har bir fuqaro mas’uliyat bilan faol ishtirok etishi zarurligi qayd etildi.