Xalq deputatlari Bag‘dod tumani Kengashi deputati tomonidan aholini qiynab kelayotgan sug‘orish suvi taqchilligi masalasi yuzasidan yuborilgan deputatlik so‘rovi o‘zining ijobiy yechimini topdi.

Tuman Kengashi deputati G‘.Abdullayev tomonidan yuborilgan deputatlik so‘rovida "Qo‘shtegirmon-1", "Nurafshon" va "Qo‘shtegirmon-2" mahalla fuqarolar yig‘inlarining "Farobiy", "Uzun", "Obod", "Soy sohili" ko‘chalari hamda "Dehqon" qishlog‘ida istiqomat qiluvchi 300 dan ortiq xonadonni suv bilan ta’minlashdagi muammo ko‘tarilgan edi.

Mazkur murojaat asosida tuman hokimligi tomonidan masala atroflicha ko‘rib chiqildi hamda Qo‘shtegirmon arig‘ining suv taqsimlash inshootiga 2 dona suv darvozasi (zatvor) o‘rnatish uchun "Infratuzilma va ijtimoiy barqarorlik" jamg‘armasi mablag‘lari hisobidan mablag‘ ajratildi.

Ushbu amaliy chora-tadbirlar natijasida hududdagi yuzlab xonadonlarning suv ta’minotini yaxshilashga xizmat qiladigan muhim muammo bartaraf etildi.