Xalq deputatlari Marg‘ilon shahar Kengashi deputatlari X.Abdurahmonov va M.Raimdjanov tomonidan Xalq deputatlari Marg‘ilon shahar Kengashining 2026-yil 21-fevraldagi VII-21-17-11-168-K/26-son qarori bilan tasdiqlangan Marg‘ilon shahrini aholining yashashi va tadbirkorlik faoliyati bilan shug‘ullanishi uchun namunali hududga aylantirish bo‘yicha “Taraqqiyot va yetakchilik maskani” dasturi doirasida amalga oshirilayotgan bunyodkorlik ishlari o‘rganildi.

Jumladan, “Tut tagi” mahalla fuqarolar yig‘inining Ipak yo‘li ko‘chasida istiqomat qiluvchi aholi uchun muhim ahamiyatga ega bo‘lgan oqava suv tarmog‘ini tortish ishlari joyiga chiqqan holda ko‘zdan kechirildi.

Mazkur loyiha doirasida 200 dan ziyod xonadonni qamrab oluvchi, umumiy uzunligi 1,7 kilometr bo‘lgan oqava suv tarmog‘i barpo etilmoqda. Loyihaning umumiy qiymati 2 milliard so‘mni tashkil etib, uning amalga oshirilishi hudud infratuzilmasini yaxshilash, aholining turmush sharoitini yanada qulaylashtirish hamda sanitariya-gigiyena holatini mustahkamlashga xizmat qiladi.

O‘rganish jarayonida deputatlar tomonidan qurilish-montaj ishlarining sifati, belgilangan muddatlarga rioya etilishi hamda aholi manfaatlarini ta’minlash masalalariga alohida e’tibor qaratildi. Shuningdek, loyiha ijrosini samarali tashkil etish va ishlarni o‘z vaqtida yakunlash yuzasidan mas’ullarga tegishli tavsiyalar berildi.