ЁШЛАРГА — ЗАМОНАВИЙ КАСБ ВА ЮҚОРИ ДАРОМАДЛИ ИШ
Бугун ёшларга замонавий билим ва касб бериш, уларнинг меҳнат бозорида муносиб ўрин эгаллаши ҳамда барқарор даромад топиши учун шароит яратиш давлат сиёсатидаги устувор вазифалардан бирига айланмоқда. Қорақалпоғистонда ҳам бу борадаги ишлар янги босқичга кўтарилмоқда.
Президентимиз Шавкат Мирзиёевнинг 2026 йил 19 сентябрь куни Нукус шаҳрида Қорақалпоғистонни ижтимоий-иқтисодий ривожлантириш масалаларига бағишланган йиғилишида ёшларни замонавий касбларга йўналтириш ва уларни юқори даромадли иш билан таъминлаш бўйича муҳим вазифалар белгиланди.
Жумладан, бир йилда 1 минг нафар, келгуси икки йилда яна 5 минг нафар ёшни ахборот технологиялари ва логистика соҳаларида юқори даромадли иш билан таъминлаш вазифаси қўйилди. Олис ҳудудларда яшаётган ёшларни ҳам замонавий касбларга жалб этиш мақсадида ахборот технологияларини ўргатиш учун иқтидорли ватандошларни жалб қилган ҳолда махсус лойиҳаларни амалга ошириш белгиланди.
Ёшларнинг сифатли касб эгаллашида касбий таълим тизимига халқаро тажрибаларни жорий этишга ҳам алоҳида эътибор қаратилмоқда. Нукус шаҳридаги 1-сон техникумда “Pearson BTEC” халқаро дастури йўлга қўйилган бўлиб, уни муваффақиятли тамомлаган битирувчиларга 70 та давлатда тан олинадиган касб сертификатларини олиш имконияти яратилган. Янги йилдан Амударё, Беруний, Чимбой ва Қўнғирот туманларидаги биттадан техникумда ҳам ушбу тажрибани жорий этиш режалаштирилган.
Яна бир муҳим янгилик — ёшларнинг касб ўрганиши ва ўзини ўзи банд қилиши учун молиявий кўмакнинг кенгайтирилишидир. 2026 йил 1 октябрдан асбоб-ускуна харид қилиш учун бериладиган ссуда миқдори 20 миллион сўмдан 50 миллион сўмга оширилади. Шунингдек, “уста-шогирд” асосида касб ўрганиш харажатларини қоплашда ёш чегараси 30 ёшдан 40 ёшга кўтарилади.
Бу имкониятлар Хўжайли тумани ёшлари учун ҳам замонавий касбларни эгаллаш, IT ва логистика каби талаб юқори соҳаларда ишлаш, ўз тадбиркорлик фаолиятини йўлга қўйиш ва меҳнат бозорида рақобатбардош мутахассис бўлиб етишиш учун муҳим шароитлар яратади.
Энг муҳими, бугун ёшларга фақат иш ўрни эмас, балки касб, билим, замонавий кўникма ва ўз меҳнати орқали юқори даромад топиш имконияти яратилмоқда.
ЁШЛАР — ТАРАҚҚИЁТНИНГ АСОСИЙ КУЧИ
Замонавий касбни пухта эгаллаган, рақамли технологияларни биладиган ва ташаббускор ёш — бу нафақат ўз келажагини, балки юрти тараққиётини ҳам белгилайдиган кучдир. Шу боис Хўжайлида ҳам ёшларнинг билим ва иқтидорини қўллаб-қувватлаш, уларни талаб юқори бўлган касбларга йўналтириш ва бандлигини таъминлашга қаратилган имкониятлардан самарали фойдаланиш муҳим.
Бугун касб эгаллаган ёш — эртага ўз оиласига даромад, маҳалласига тараққиёт, юртига янги ғоя ва янги қиймат олиб киради.

Б.Курбанов
Халқ депутатлари Хўжайли туман Кенгаши депутати