Xalq deputatlari Qo‘qon shahar Kengashi deputati F.Qaxxarova tomonidan saylovchilar murojaatlari asosida navbatdagi deputatlik so‘rovi yuborildi.

Saylovchilar bilan o‘tkazilgan uchrashuvlar hamda hududda olib borilgan o‘rganishlar davomida “Shaldiramoq” mahalla fuqarolar yig‘ini, Bahmalbof ko‘chasida yashovchi fuqarolar tomonidan elektr ta’minoti bilan bog‘liq muammolar yuzasidan murojaat bildirildi.

Murojaatda mahalla hududidagi elektr uzatish tarmoqlariga tegishli ayrim simyog‘ochlarning texnik holati talab darajasida emasligi, kuchli shamol va noqulay ob-havo sharoitlarida elektr tarmoqlarida tez-tez nosozliklar yuzaga kelayotgani qayd etildi.

Shuningdek, elektr simlarining tutashuvi natijasida chaqnashlar sodir bo‘lib, ayrim hollarda simyog‘ochlar va tarmoqlarning shikastlanishi kuzatilayotgani, bu esa aholi xavfsizligi hamda elektr energiyasi ta’minoti barqarorligiga salbiy ta’sir ko‘rsatayotgani ta’kidlandi.

Mazkur murojaat asosida deputat tomonidan tegishli mas’ul tashkilotlarga deputatlik so‘rovi yuborilib, hududdagi elektr uzatish tarmoqlari va simyog‘ochlarning texnik holatini mutaxassislar ishtirokida o‘rganish, eskirgan infratuzilmani yangilash hamda zarur ta’mirlash ishlarini amalga oshirish masalalari ko‘tarildi.

Deputatlik so‘rovida amalga oshiriladigan ishlar muddati va rejalashtirilgan chora-tadbirlar yuzasidan asoslantirilgan ma’lumot taqdim etish ham so‘ralgan.

Mazkur masala deputat nazoratiga olingan bo‘lib, uning ijrosi yuzasidan qo‘shimcha ma’lumotlar jamoatchilikka muntazam ravishda yetkazib boriladi.

Xalq deputatlari Qo‘qon shahar Kengashi