Deputatlik so‘rovi yuborildi.

Xalq deputatlari Angor tumani Kengashi kotibiyat mudiri Jamshid Raximqulov tomonidan fuqarolar murojaati asosida tegishli tashkilotlarga deputatlik so‘rovi yuborildi.

Murojaatda Gulzor mahalla fuqarolar yig‘ini hududidagi Fidokor, Yoshlik, Bo‘ston hamda Kamolat ko‘chalarida elektr energiyasi ta’minotidagi muammolar yuzasidan aholi tomonidan bildirilgan murojaatlar qayd etilgan. Xususan, elektr quvvatining pastligi sababli fuqarolar foydalanayotgan maishiy texnika vositalarining to‘laqonli ishlamayotgani, kechki paytlarda esa elektr chiroqlarining xiralashib qolayotgani aholi orasida haqli e’tirozlarni keltirib chiqarmoqda.

Mazkur holatlarni bartaraf etish, aholini sifatli va barqaror elektr energiyasi bilan ta’minlash maqsadida murojaatda keltirilgan masalalarni joyiga chiqqan holda atroflicha o‘rganish, mavjud muammolarning sabablarini aniqlash hamda ularni bartaraf etish bo‘yicha tegishli choralar ko‘rish so‘raldi.

Shuningdek, ko‘rilgan choralar va o‘rganish natijalari yuzasidan deputatlik so‘roviga qonunchilikda belgilangan muddatlarda asoslantirilgan javob taqdim etish so‘raladi.