Bugun “Bahor” restoranida, o‘qituvchi va murabbiylar kuni munosabati bilan o‘tkazilgan bayram tadbiriga xalq ta’limi sohasining ilg‘or va fidoiy vakillari jam bo‘ldilar.

Tadbirda xalq ta’limi tizimida uzoq yillar samarali faoliyat ko‘rsatgan faxriy pedagoglar, ta’lim sohasining yetakchilari hamda yurtimizda ta’lim ravnaqi yo‘lida sidqidildan mehnat qilayotgan 250 nafarga yaqin ustoz va murabbiylar ishtirok etdi.

Tantanali marosimda Toshkent shahar hokimining o‘rinbosari Durdona Rahimova, Mirobod tumani hokimi Anvar Sayfutdinov hamda tuman prokurori Bobur Abdullayev, Xalq deputatlari Mirobod tuman Kengashining Ijtimoiy soha, yoshlar siyosati, ta’lim, sog‘liqni saqlash, madaniyat va sport masalalari bo‘yicha doimiy komissiyasi a'zo deputatlari so‘zga chiqib, ta’lim tizimida alohida o‘rnak bo‘layotgan ustozlarni tabrikladilar.

Tadbirda ustoz va murabbiylar nafaqat bilim va ko‘nikmalarni beruvchi, balki yosh avlod qalbiga yuksak ma’naviy qiymatlar, insonparvarlik, Vatanga muhabbat, sadoqat va fidoyilik tuyg‘ularini singdiradigan buyuk tarbiyachi ekani alohida ta’kidlandi. Yangi O‘zbekistonni barpo etishda hal qiluvchi kuch – ma’rifatli va tarbiyali avlodni voyaga yetkazishda ustozlarning o‘rni beqiyos ekani ta’kidlab o‘tildi.