Tadbir Oliy Majlis Senati huzuridagi Hududiy vakillik organlari faoliyatini o‘rganish markazi tomonidan ishlab chiqilgan namunaviy dastur asosida tashkil etildi. Unda xalq deputatlari Toshkent shahar Kengashi raisi R. Kalanov, hamda Kengashlari kotibiyati mudirlari va doimiy komissiyalar raislari faol ishtirok etdi. Seminarda mahalliy byudjet, tadbirkorlikni rivojlantirish va iqtisodiy islohotlar, korrupsiyaga qarshi kurashish va xavfsizlik, ijtimoiy soha, yoshlar siyosati, madaniyat va sport, shuningdek, agrar soha, suv xo‘jaligi va ekologiya yo‘nalishlaridagi doimiy komissiyalar faoliyati yuzasidan tajribalar taqdim etildi. Shu bilan birga, Kengash kotibiyatlari tomonidan Kengash ishini tashkiliy-texnik jihatdan boshqarish borasidagi amaliy ishlar haqida ma’lumot berildi. Tadbir davomida mahalliy Kengashlar faoliyatini tashkiliy-huquqiy va uslubiy jihatdan qo‘llab-quvvatlash, norma ijodkorligini samarali tashkil etish, qarorlar qabul qilishda qonuniylikni ta’minlash, mahalliy byudjet va hududlarni ijtimoiy-iqtisodiy rivojlantirish dasturlarini shakllantirish hamda ijrosini nazorat qilish, ijroiya hokimiyat organlari bilan o‘zaro hamkorlikni yo‘lga qo‘yish, shuningdek, rejalashtirish va hisobot yuritish masalalariga alohida e’tibor qaratildi.