Korrupsiyaga qarshi kurashish masalalari muhokama qilindi

Mamlakatimizda korrupsiyaga qarshi qat’iy kurashish, fuqarolar manfaatlarini himoya qilish va jamiyatda halollik muhitini qaror toptirish borasida keng ko‘lamli ishlar amalga oshirilmoqda. Prezidentimiz raisligida joriy yil 5-mart kuni bo‘lib o‘tgan Korrupsiyaga qarshi kurashish bo‘yicha Milliy kengashining navbatdagi yig‘ilishida ushbu yo‘nalishdagi ishlarni yanada samarali tashkil etish bo‘yicha aniq vazifalar belgilab berildi.

Bugun ushbu vazifalar ijrosi doirasida Korrupsiyaga qarshi kurashish bo‘yicha tuman Kengashining navbatdagi yig‘ilishi o‘tkazildi. Kengash raisi, tuman hokimi Shuxrat Nazarov boshchiligida o‘tgan yig‘ilishda sud va huquqni muhofaza qiluvchi organlar, mahalliy kengash deputatlari, tuman hokimining o‘rinbosarlari, korxona va tashkilotlar rahbarlari hamda "mahalla yettiligi" vakillari ishtirok etdi.

Yig‘ilishda Jinoyat ishlari bo‘yicha tuman sudi raisi Shahobiddin Hasanov va tuman prokurorining o‘rinbosari Miraxmed Pardayevning axborotlari tinglandi. Taqdimotlarda tumandagi korrupsiyaviy holatlar tahlil qilinib, ularning oldini olish borasida ko‘rilayotgan chora-tadbirlar, profilaktik ishlar, tahdid manbalari va nazorat mexanizmlari haqida ma’lumot berildi.

Yakunda mas’ullarga har bir tashkilotda korrupsiya xavflarini baholash va bartaraf etish bo‘yicha "yo‘l xaritasi" ishlab chiqish, xodimlar o‘rtasida halollik va mas’uliyat muhitini mustahkamlash, jamoatchilik nazoratini kuchaytirish bo‘yicha aniq vazifalar topshirildi.

Bundan ko‘zlangan asosiy maqsad — fuqarolar manfaatini ta’minlash, ochiqlik va hisobdorlik tamoyillarini hayotga tatbiq etish hamda korrupsiyaga qarshi kurashishda jamoaviy mas’uliyatni kuchaytirishdan iborat.