Xalq deputatlari Ishtixon tuman Kengashi deputati Gulmira Safarova tomonidan Mohpar mahallasida ko‘chmas mulkka bo‘lgan huquqlarni davlat ro‘yxatidan o‘tkazish masalasida muammolarga duch kelayotgan fuqarolarning murojaatlari o‘rganildi.

Muloqot jarayonida ayrim fuqarolar tomonidan uy-joy hujjatlarini rasmiylashtirish, yer uchastkalariga bo‘lgan huquqlarni davlat ro‘yxatidan o‘tkazish, meros asosida o‘tgan mulkni qonuniylashtirish hamda kadastr hujjatlaridagi kamchiliklar bilan bog‘liq masalalar ko‘tarildi. Deputat tomonidan har bir murojaat alohida tinglanib, amaldagi qonunchilik talablari asosida huquqiy tushuntirishlar berildi.

Shuningdek, asosiy e’tibor O‘zbekiston Respublikasining “Ko‘chmas mulkka bo‘lgan huquqlarni davlat ro‘yxatidan o‘tkazish to‘g‘risida”gi Qonuni mazmun-mohiyatini aholiga yetkazish, mazkur qonun talablarini targ‘ib qilish hamda fuqarolarga huquqiy tushuntirish berishga qaratildi.

Murojaatlar yuzasidan tegishli tashkilotlar bilan hamkorlikda ishlash, zarur hollarda deputatlik so‘rovi yuborish orqali fuqarolarning muammolarini ijobiy hal etishga ko‘maklashish ta’kidlandi. Mazkur muloqot qonun mazmunini aholiga yetkazish hamda fuqarolarning mulkiy huquqlarini ishonchli himoya qilishga xizmat qiladi.