Xalq deputatlari Chilonzor tumani Kengashining Qurilish, kommunal, suv xo‘jaligi, ekologiya va sanoat masalalari bo‘yicha doimiy komissiyasi yig‘ilishi bo‘lib o‘tdi.
Yig‘ilishda O‘zbekiston Respublikasi Prezidentining 2026-yil 5-fevraldagi “Ko‘p kvartirali uylarni boshqarish tizimini yanada takomillashtirish bo‘yicha qo‘shimcha chora-tadbirlar to‘g‘risida”gi PQ-48-son qarori ijrosini ta’minlash masalasi atroflicha va tanqidiy ruhda muhokama qilindi.
Qarorga muvofiq, Chilonzor tumanidagi ko‘p kvartirali uylar va ularga tutash hududlarni obodonlashtirish, bolalar maydonchalari, yo‘laklar va irrigatsiya tarmoqlarini ta’mirlash, shuningdek, uy-joy fondini kuz-qish mavsumiga tayyorlash uchun katta miqdorda mablag‘lar ajratilgani qayd etildi.Tanqidiy yondashuv: mablag‘ bor, natija-chi?
Yig‘ilishda ajratilayotgan mablag‘larning o‘zlashtirilishi bilan ish bitmasligi, eng muhimi, ushbu mablag‘lar hisobidan aholiga qanday amaliy natija yaratilayotgani muhim ekani alohida ta’kidlandi.
Ayrim ko‘p kvartirali uylar atrofida yo‘laklarning nosozligi, bolalar maydonchalarining talab darajasida emasligi, irrigatsiya tarmoqlaridagi muammolar hamda obodonlashtirish ishlarida kamchiliklar mavjudligi tanqidiy muhokama qilindi.
Deputatlar tomonidan qurilish-ta’mirlash ishlarini faqat qog‘ozdagi hisobot va bajarilgan ish hajmi bilan baholamasdan, ularning sifati, belgilangan muddatlarda bajarilishi va eng muhimi, aholining roziligi asosida baholash zarurligi qayd etildi.
Shuningdek, ajratilgan mablag‘lardan maqsadli va samarali foydalanish, loyiha-smeta hujjatlarini puxta ishlab chiqish, bajarilgan ishlarning hajmi va sifatini joyiga chiqib tekshirish hamda kamchiliklarga yo‘l qo‘ygan mas’ullarning javobgarligini oshirish masalalariga urg‘u berildi.
Deputatlar uchun asosiy mezon — qancha mablag‘ sarflangani emas, balki shu mablag‘ evaziga aholining kundalik hayotida qanday real o‘zgarish yuz berganidir.
Yig‘ilish yakunida PQ-48-son qarorida belgilangan vazifalarning ijrosini ta’minlash, ajratilgan mablag‘larning maqsadli sarflanishi, qurilish-ta’mirlash ishlarining sifati va muddatlariga qat’iy rioya etish yuzasidan mas’ullarga tegishli vazifalar belgilandi.
Mazkur yo‘nalishdagi ishlar deputatlik nazorati ostida davom ettiriladi.