Kelesi jılı Qaraqalpaqstanǵa 5 milliard dollar investiciya alıp keliw wazıypasınıń qoyılǵanı jańa óndiris quwatlıqların iske qosıw, isbilermenlikti keńeytiw hám jańa jumıs orınların jaratıw ushın úlken imkaniyat bolıp esaplanadı.

Xalıq ushın da áhmiyetli infrastruktura joybarları ámelge asırıladı. Tashkent-Nókis tezjúrer poezdı qatnawınıń jolǵa qoyılıwı menen sapar waqtı 16 saattan 7 saatqa shekem qısqaradı.

Qońırattan Moynaqqa 100 kilometr ishimlik suw tarmaǵınıń tartılıwı hám "Túyemoyın" suw tazalaw imaratınıń rekonstrukciyalanıwı suw támiynatın jaqsılawǵa xızmet etedi.

Isbilermenler ushın 300 milliard swmlıq kredit liniyasınıń 12 procentke shekem tómenletilgen stavkada beriliwi, jeke menshik baqsha shólkemlestiretuǵın isbilermenlerge 15 jıl múddetke 7 procentlik kredit beriliwi biznesti rawajlandırıw ushın anıq finanslıq sharayat jaratadı.

Medicina tarawında Universitet medicinalıq klasteriniń shólkemlestiriliwi bolsa Balalar klinikası, Onkologiya orayı, Medicina akademiyası hám kóp tarmaqlı emlewxananı birden-bir sistemaǵa birlestirip, xalıqqa zamanagóy medicinalıq xızmetlerden paydalanıw imkaniyatların keńeytedi.

Bilimlendiriw hám jaslar ushın xalıqaralıq standarttaǵı kásiplik tayarlaw imkaniyatları keńeymekte. Nókistegi 1-sanlı texnikumda "Pearson BTEC" baǵdarlaması tiykarında bilimlendiriw jolǵa qoyılǵan bolıp, pitkeriwshilerge 70 mámlekette tán alınatuǵın sertifikat beriledi. Jańa jıldan bul tájiriybe Ámiwdárya, Beruniy, Shımbay hám Qońırattaǵı texnikumlarda da engiziledi.

"Jasıl" energetikanı rawajlandırıw hám karbon kreditlerinen túsetuǵın qarjılardıń Qaraqalpaqstannıń ózinde qalıwı aymaqtıń jańa dáramat dereklerin qáliplestiriwge xızmet etedi.

Sonday-aq, Berdaq Ǵarǵabay ulı tuwılǵanınıń 200 jıllıǵın mámleket kóleminde belgilew boyınsha belgilengen wazıypalar ullı babamızdıń ilimiy-dóretiwshilik miyrasın keńnen úgit-násiyatlaw ushın áhmiyetli imkaniyat jaratadı.

Deputat sıpatında aytıp ótpekshimen, sapar dawamında belgilengen wazıypalardıń eń tiykarǵı tárepi — imkaniyatlardıń anıq finanslıq mexanizmler, infrastruktura joybarları hám jańa jumıs orınları menen baylanısqanlıǵı bolıp esaplanadı. Endigi wazıypa bul imkaniyatlardı hár bir máhállege jetkeriw, xalıqtıń olardan ámelde paydalanıwın támiyinlewden ibarat.

Xalıq deputataları Shomanay rayonlıq Keńesi deputatı Azamat Qutlımuratov