O‘rganish jarayonida tuman hokimi aholi bilan bevosita muloqot qilib, Paxtachi mahallasini zamonaviy shaharsozlik mezonlari asosida yangi qiyofaga keltirish zarurligini alohida ta’kidladi. Xususan, ayrim fuqarolar tomonidan xonadon hujjatlarida belgilangan chegaralardan chiqib, qo‘shimcha yerlarni egallash hamda ko‘chalarni toraytirib qo‘yish holatlariga barham berish lozimligi qayd etildi. Bu borada qonuniylikni ta’minlash, mavjud kamchiliklarni bartaraf etish yuzasidan mas’ullarga aniq topshiriqlar berildi.

Shuningdek, mahallada amalga oshirilayotgan infratuzilma loyihalariga alohida e’tibor qaratildi. Jumladan, maktab uchun zamonaviy sport zali va qo‘shimcha o‘quv binosi qurilishi, ichki ko‘chalarni asfaltlashtirish, piyodalar yo‘laklarini barpo etish, tungi yoritish chiroqlarini o‘rnatish hamda sug‘orish ariqlarini betonlashtirish ishlari izchil davom etmoqda. Mazkur bunyodkorlik ishlari hudud infratuzilmasini yaxshilash, yoshlar uchun munosib sharoit yaratish va mahalla obodligini ta’minlashga xizmat qilishi ta’kidlandi.

Uchrashuv davomida fuqarolar tomonidan bildirilgan taklif va murojaatlar tinglanib, ularni ijobiy hal etish yuzasidan tegishli mutasaddilarga vazifalar yuklatildi. O‘rganish ishlari Paxtachi mahallasini har tomonlama rivojlantirish, tartib-intizomni mustahkamlash va hududni yanada obod maskanga aylantirishga qaratilgani bilan ahamiyat kasb etdi.