Urganch shahrida 2026-yil 12–13-fevral kunlari muhim va mazmunli ikki kunlik treninglar bo‘lib o‘tdi. Unda Xalq deputatlari Yangibozor va Shovot tumanlari hamda Xiva shahar Kengashlari huzuridagi Ijtimoiy soha, yoshlar siyosati, madaniyat va sport masalalari bo‘yicha doimiy komissiya a’zolari, shuningdek Yoshlar maslahat guruhlari vakillari ishtirok etdi.

Mazkur treninglar Shvetsariya Taraqqiyot va hamkorlik agentligining moliyaviy ko‘magida “Yuksalish” harakati, BMTning Bolalar jamg‘armasi (UNICEF) hamda BMT Taraqqiyot dasturi hamkorligida, BMTning “O‘zbekistonda yoshlar va bolalar uchun qulay mahalliy boshqaruvning inklyuziv transformatsiyasi” loyihasi doirasida tashkil etildi.

Tadbirlarning bosh maqsadi — yoshlarni qaror qabul qilish jarayonlariga faol jalb etish, mahalliy boshqaruvda ularning fikr va tashabbuslarini inobatga olish hamda yoshlar maslahatlari mexanizmlarini yanada rivojlantirishdan iborat bo‘ldi.

Trening davomida ishtirokchilar yoshlar va bolalar ishtirokini ta’minlash borasidagi xalqaro hamda milliy tajribalar bilan yaqindan tanishdi. Byudjet jarayonlariga oid amaliy mashg‘ulotlar tashkil etilib, ishtirokchilar o‘z hududlarida yoshlar ishtirokini kuchaytirishga qaratilgan aniq taklif va tashabbuslarni ishlab chiqishdi. Shuningdek, kelgusi 6 oyga mo‘ljallangan harakatlar rejasi ham shakllantirildi.

Yakunda qatnashchilar mahalliy boshqaruv tizimida yoshlar maslahatlari tuzilmasi, ularning vakolatlari va funksiyalari haqida batafsil bilimga ega bo‘lishdi hamda ushbu mexanizmlardan samarali foydalanish bo‘yicha zarur ko‘nikmalarni mustahkamlashdi.