Xalq deputatlari Ishtixon tuman Kengashi deputatlari hamda tuman Adliya bo‘limi boshlig‘i D.Ubaydullayev ishtirokida qaror loyihalarini qonunchilik talablariga muvofiq, aniq va puxta shakllantirish masalalari yuzasidan uchrashuv tashkil etildi.

Muloqot davomida Xalq deputatlari Ishtixon tuman Kengash tomonidan ishlab chiqilayotgan qaror loyihalarini huquqiy ekspertizadan o‘tkazish, ularni amaldagi normativ-huquqiy hujjatlarga moslashtirish va huquqiy xatolarning oldini olish bo‘yicha hamkorlik mexanizmi kelishib olindi. Kelishuvga ko‘ra, deputatlar tomonidan tayyorlanadigan qaror loyihalari tuman Adliya bo‘limi tomonidan ko‘rib chiqilib, huquqiy xulosa va amaliy tavsiyalar beriladi. Bu esa hujjatlarning mazmunan asosli, huquqiy jihatdan to‘liq va ijro uchun qulay bo‘lishini ta’minlaydi.

Shuningdek, qarorlar qabul qilinishidan oldin ularning qonunchilikka muvofiqligini ta’minlash, kelgusida turli talqin va tushunmovchiliklarning oldini olish hamda ijro intizomini mustahkamlash masalalariga alohida e’tibor qaratildi.

Uchrashuv yakunida mazkur hamkorlikni tizimli yo‘lga qo‘yish, muntazam maslahatlashuvlar o‘tkazib borish va qarorlar sifatini yanada oshirish bo‘yicha kelishuvga erishildi. Ushbu mexanizm Xalq deputatlari Ishtixon tuman Kengash faoliyatining samaradorligini oshirish, hududda qonuniylikni ta’minlash hamda qabul qilinayotgan qarorlarning barqaror va amaliy ahamiyatini kuchaytirishga xizmat qiladi.