Tadbirkorlikni rivojlantirishga qaratilgan davlat siyosati mamlakatda ishbilarmonlik muhitini tubdan o‘zgartirdi. Prezidentimizning tadbirkorlar bilan ochiq muloqotida bugungi kunda erishilgan natijalar bilan birga, kelgusida amalga oshiriladigan muhim chora-tadbirlar ham belgilandi. Hisob-kitoblarga ko‘ra, so‘nggi yillarda 139 ming korxonada ish o‘rinlari 811 mingtaga ko‘paydi. Xodimlar soni 2,2 milliondan 3 million nafarga yetdi. 273 ming korxonada ish haqi fondi 22 foizga yoki 4,6 trillion so‘mga oshdi. Bu raqamlar mamlakatda tadbirkorlik rivojlanishining aholining daromadlariga to‘g‘ridan-to‘g‘ri ijobiy ta’sirini ko‘rsatmoqda.

2024 yili xususiy sektorda o‘rtacha oylik ish haqi 4 million so‘mni tashkil etgan bo‘lsa, bugungi kunda bu ko‘rsatkich 5 million so‘mga yaqinlashdi. Ayni vaqtda tadbirkorlik sohasidagi sun’iy to‘siqlar olib tashlanishi orqali faoliyat yuritish imkoniyatlari yanada
kengaydi. Davlatimiz rahbari eng ilg‘or va fidoyi tadbirkorlarning 49 nafari davlat mukofotlari, 112 nafari esa “Faol tadbirkor” ko‘krak nishoni bilan taqdirlanganini alohida ta’kidlab o‘tdi. Bu esa tadbirkorlarga bo‘lgan yuksak e’tibor va g‘amxo‘rlikning amaliy ifodasidir.

Muloqotda kichik tadbirkorlar, o‘zini o‘zi band qilgan shaxslarni qo‘llab-quvvatlash, yangi imkoniyatlar yaratish va tadbirkorlik sohasini yanada rivojlantirishga qaratilgan qator chora-tadbirlar belgilandi. Shu tariqa, O‘zbekistonda tadbirkorlik faqat iqtisodiy taraqqiyotning emas, balki xalqimiz farovonligini ta’minlashning ham asosiy omili sifatida qaror topmoqda.

Xalq deputatlari tuman Kengashi deputati A.Allamov