Mamlakatimizga Bolgariya Respublikasi Prezidenti Rumen Radev rasmiy tashrif bilan keldi. Ushbu tashrif tarixiy ahamiyatga ega bo‘lib, ikki mamlakat o‘rtasidagi munosabatlar sifat jihatidan yangi bosqichga ko‘tarildi.

Ayniqsa, taʼlim sohasida erishilgan kelishuvlar kelajakdagi avlodlar manfaatlariga xizmat qiluvchi muhim qadamlar bo‘ldi.

Yuqori taʼlim va ilmiy hamkorlik: – Tashrif doirasida O‘zbekiston va Bolgariya universitetlari rektorlari o‘rtasidagi uchrashuvlarni tashkil etish bo‘yicha kelishuvga erishildi. Bu bilan ikki mamlakat o‘rtasida ilmiy-tadqiqot va akademik almashinuvlar yo‘lga qo‘yiladi.

Yoshlar uchun yangi imkoniyatlar: – Bolgariya oliygohlarida o‘zbekistonlik talabalar uchun grant asosida taʼlim olish imkoniyatlari ko‘rib chiqildi. Bu yurtdoshlarimizga Yevropa standartlariga mos bilim olish imkonini yaratadi. 

Ilm-fan va innovatsiyalar: – Taʼlim sohasida IT, sunʼiy intellekt va muhandislik yo‘nalishlarida qo‘shma dasturlarni amalga oshirish masalalari muhokama qilindi. Bolgariyaning innovatsion taʼlim tajribasi yurtimizdagi oliy taʼlim tizimiga joriy etilishi rejalashtirilmoqda.

Madaniy va til almashinuvi: – Bolgar tili kurslarini O‘zbekiston OTMlarida tashkil etish, madaniy haftaliklar va talabalar almashinuvini tashkil qilish rejalashtirildi. Bu ikki xalq o‘rtasidagi do‘stona munosabatlarni mustahkamlaydi. 

Biz, mahalliy Kengash deputatlari, ushbu tashrif doirasida erishilgan natijalardan ruhlanib, ularni joylarda hayotga tatbiq etishga masʼulmiz. Taʼlim — millat kelajagi. Ushbu yangi imkoniyatlardan samarali foydalanish har birimizning vazifamizdir.

Anorboyeva Go‘zal Farxodovna, Jizzax shahar Kengashi deputati.