O‘zbekiston Respublikasi Prezidentining 2025-yil 6-martdagi PQ-93-sonli qarori doirasida Sirdaryo viloyatida ishbilarmonlik muhitini yaxshilash, infratuzilmani modernizatsiya qilish va aholi turmush darajasini oshirish bo‘yicha muhim chora-tadbirlar amalga oshirilmoqda. Ushbu dasturga kiritilgan loyihalardan biri 18- 41-49-53-sonli umumiy o‘rta ta’lim maktablarida olib borilayotgan qurilish va ta’mirlash ishlari.

Xalq deputatlari Boyovut tumani Kengashi deputatlari G.Qarshiboyeva, X.Qo‘ldoshev, J.Raxmonqulovlar o‘z hududlaridagi maktablarda olib borilayotgan ishlarni bevosita o‘rganish maqsadida hududga tashrif buyurdilar. 

Ular loyiha doirasida amalga oshirilayotgan qurilish ishlari, sinf xonalari va yordamchi binolarning modernizatsiyasi, o‘quvchilarga qulay sharoit yaratish borasidagi tashabbuslar bilan tanishdilar.

Maktab jamoasi va mahalliy aholi vakillari bilan bo‘lib o‘tgan muloqotda ta’lim sifatini oshirishga qaratilgan rejalarga alohida e’tibor qaratildi. Yangi sinfxonalar, zamonaviy laboratoriyalar va sport inshootlari bilan boyitilayotgan muhit kelajak avlod uchun yanada sifatli ta’lim olish imkoniyatini yaratishi kutilmoqda.

Deputatlar ta’lim muassasalarining ahamiyatini e’tirof etib, zamonaviy maktab infratuzilmasi yosh avlodning salohiyatini to‘liq ro‘yobga chiqarishga xizmat qilishini ta’kidladilar. Kelgusida maktabni yanada rivojlantirish bo‘yicha qo‘shimcha chora-tadbirlar ko‘rilishi rejalashtirilgan.

Xalq deputatlari Boyovut tumani kengashi kotibiyati.