Turnirning final bosqichi ayni paytda o‘tkazilmoqda. Tadbirning ochilish marosimida Zomin tumani hokimi Alisher Abdug‘aniyev so‘zga chiqib, barcha ishtirokchilarni qutladi, ularga omad tiladi va bu kabi musobaqalarning sportchilar hayotidagi o‘rni haqida to‘xtalib o‘tdi.

Tuman hokimi nutqida bu kabi xalqaro tadbirlar sportchilarning tajriba almashishida, jismoniy va ruhiy salohiyatini oshirishda, eng asosiysi, mamlakatimiz sport nufuzini xalqaro maydonda mustahkamlashda muhim ahamiyatga ega ekanini ta’kidladi.

Musobaqa Zomin tumani sport maktabi bazasida tashkil etilgan bo‘lib, unda O‘zbekistonning turli hududlaridan tashrif buyurgan eng iqtidorli va istiqbolli sportchilar bilan bir qatorda, qo‘shni davlatlar hamda boshqa xorijiy mamlakatlardan kelgan sportchilar ham ishtirok etmoqda. Bu esa turnirga chinakam xalqaro maqom baxsh etmoqda.

Musobaqa sportchilar uchun faqatgina bellashuv emas, balki o‘zaro tajriba almashish, professional mahoratni oshirish va xalqaro do‘stlik rishtalarini mustahkamlash uchun ham katta maydonga aylanmoqda. Yosh sportchilar ushbu turnir orqali o‘z iste’dodlarini keng jamoatchilikka namoyon etish, murabbiylar esa o‘z shogirdlarining salohiyatini sinovdan o‘tkazish imkoniga ega bo‘lmoqda.

Shuni alohida ta’kidlash lozimki, “ZOMIN OPEN II” xalqaro turniri nafaqat sport sohasida, balki Zomin tumanining turizm salohiyati, mehmondo‘stligi va zamonaviy infratuzilmasini namoyon etish borasida ham muhim ahamiyat kasb etmoqda. Bu kabi yirik sport tadbirlari viloyat va respublika miqyosida sog‘lom turmush tarzini keng targ‘ib qilish, yosh avlodni sportga jalb etishda katta ijobiy ta’sir ko‘rsatmoqda.

Musobaqa yakunida g‘olib va sovrindor sportchilar tashkilotchilar tomonidan medal, diplom va qimmatbaho sovg‘alar bilan taqdirlanadi. Eng asosiysi, ular uchun bu g‘alabalar keyingi katta sport bosqichlariga yo‘l ochadi.