Mahallalarda aholi bandligini ta’minlash, tadbirkorlikni rivojlantirish, oilalarni kambag‘allikdan chiqarish hamda fuqarolarning daromad manbalarini kengaytirish borasida amalga oshirilayotgan ishlarning samaradorligini oshirish deputatlik nazoratining muhim yo‘nalishlaridan biridir.

Shu maqsadda Xalq deputatlari Termiz shahar Kengashi kotibiyat bosh mutaxassisi A.Temirov, Kengashning 6-“Alpomish” saylov okrugi deputati A.Ashurov okrugiga qarashli “Alpomish” mahallasida bo‘lib, hokim yordamchisining bugungi kundagi faoliyati bilan tanishdi.

Mazkur jarayon “24 ta muhim yo‘nalish” doirasida tashkil etilib, mahallada amalga oshirilayotgan ishlar, aholi bilan ishlash holati, mavjud muammolar va ularni bartaraf etish bo‘yicha ko‘rilayotgan choralar atroflicha ko‘rib chiqildi.

Jumladan, 4-ustuvor yo‘nalish doirasida hokim yordamchisining faoliyati, xususan, “Tadbirkorlik faoliyati erkinligining kafolatlari to‘g‘risida”gi O‘RQ–328-son Qonun talablari asosida olib borilayotgan ishlar tahlil qilindi.

O‘rganish davomida:

- aholini kambag‘allikdan chiqarish bo‘yicha manzilli ishlar;
- ishsiz fuqarolarni doimiy daromad manbalari bilan ta’minlash;
- tadbirkorlik faoliyatini boshlash istagidagi fuqarolarni kredit, subsidiya va boshqa davlat dasturlariga jalb etish;
- oilaviy tadbirkorlikni rivojlantirish va yangi ish o‘rinlarini yaratish;
- xonadonbay ishlash tizimining samaradorligi hamda natijadorligi;
- aholi bilan ishlash jarayonida mavjud muammolar va ularning yechimlari atroflicha tahlil qilindi.

Shuningdek, mahalladagi mavjud imkoniyatlardan samarali foydalanish, aholi bandligini oshirish, tadbirkorlik tashabbuslarini qo‘llab-quvvatlash hamda fuqarolarning daromadlarini ko‘paytirish borasidagi ishlarni yanada kuchaytirish yuzasidan tegishli tavsiya va takliflar bildirildi.

Mazkur o‘rganishlar deputatlik nazoratini kuchaytirish, mahalladagi muammolarni manzilli aniqlash va ularni amaliy hal etish, aholi farovonligini ta’minlashga qaratilgan ishlarning samaradorligini oshirishga xizmat qiladi.