Xalq deputatlari Muzrabot tumani Kengashining 9-«Darband» saylov okrugidan saylangan deputat Ramazonov Muzaffar tomonidan aholi, ayniqsa, 39-sonli umumta’lim maktabi o‘quvchilarining xavfsiz harakatlanishi bilan bog‘liq muammo o‘rganilib, uni bartaraf etish yuzasidan aniq choralar ko‘rildi.

Jumladan, deputat tomonidan 2026-yil 4-aprel kuni tuman hokimining qurilish, to‘siqlarsiz muhit yaratish, kommunikatsiyalar, kommunal xo‘jalik, ekologiya va ko‘kalamzorlashtirish masalalari bo‘yicha o‘rinbosari nomiga deputatlik so‘rovi yuborildi.

Unda «Duoba», «Oriyat» va «Darband» mahallalari tutashgan hududdan o‘tuvchi markaziy avtomobil yo‘lining 1 kilometr qismi bo‘ylab piyodalar yo‘lakchasi qurish masalasi ko‘tarilib, aholi va o‘quvchilarning xavfsiz harakatlanishi uchun zarur sharoit yaratish so‘ralgan edi.

Deputatning tashabbusi va masalaning deputatlik nazoratiga olinishi natijasida bugungi kunda mazkur hududda 1 kilometrlik piyodalar yo‘lakchasi qurilishi boshlandi.
Qurilish ishlari homiylik mablag‘lari hisobidan amalga oshirilmoqda.

Mazkur obyektning qurilishi, avvalo, uchta mahalla aholisi uchun xavfsiz va qulay piyoda harakatlanish sharoitini yaratish, ayniqsa, har kuni mazkur yo‘l orqali maktabga qatnaydigan o‘quvchilarning harakat xavfsizligini ta’minlashda muhim ahamiyat kasb etadi.

Ayni paytda deputat Ramazonov Muzaffar uchun asosiy e’tibor nafaqat qurilish ishlarining boshlanganiga, balki ularning sifatli va belgilangan muddatda yakunlanishiga qaratilmoqda.

Shu maqsadda deputat tuman Kengashi kotibiyati bosh mutaxassislari Sh. Shoymardonov va B. Xoliqovlar bilan birgalikda «Darband» mahallasida bo‘lib, piyodalar yo‘lakchasi qurilishi jarayonini o‘rgandi.

O‘rganish davomida qurilish ishlarini olib borayotgan mas’ullarga piyodalar yo‘lakchasini tasdiqlangan loyiha va belgilangan me’yorlar asosida puxta, sifatli va o‘z muddatida qurib bitkazish yuzasidan tegishli tavsiya va ko‘rsatmalar berildi.